"არ მიტყდება ნანა კოსტავასთან ერთად საკრებულოში ყოფნა" - ქუთაისის საკრებულოს წევრი ”ქართული ოცნებიდან"

პოლიტიკა - 21:02, 04 Jun, 2019

1146

ქუთაისის საკრებულოს წევრი ”ქართული ოცნებიდან“, ნანა კოსტავასთან დაკავშირებით აცხადებს, რომ მას არ "უტყდება" საკრებულოში კოსტავასთან ერთად ყოფნა.

როგორც ალეკო ახალაძე ამბობს, ის ემიჯნება კოსტავას განცხადებებს, თუმცა რომ მისი თანაგუნდელობის არ რცხვენია.
„ნანა კოსტავამ ძალიან შეუფერებელი ფორმით, მაგრამ გააკეთა აგრესია იმ მოვლენაზე, რასაც ჰქვია რწმენის შეურაცხყოფა, სხვათა შორის რწმენის შეურაცხყოფა ამ შეხვედრაზეც ვიგრძენი. მე ვემიჯნები ნანა კოსტავას იმ გამონათქვამს, მაგრამ ერთმა ისიც კი მითხრა, არ გიტყდებაო ნანა კოსტავასთან საკრებულოში ყოფნაო? არ მიტყდება ნანა კოსტავასთან ერთად საკრებულოში ყოფნა, პირიქით, მე უფრო მიტყდება იმ კრიმინალური პარტიის წევრებთან ერთად საკრებულოში ყოფნა, რომლებიც ჩვენთან არიან,“ - ამბობს ქუთაისის მუნიციპალიტეტის საკრებულოს წევრი ”ქართული ოცნებიდან” ალეკო ახალაძე.

სამოქალაქო აქტივისტები აცხადებენ, რომ ისინი არ დაუშვებენ ნანა კოსტავამ ქუთაისის საკრებულოში დეპუტატის მანდატით სარგებლობა გააგრძელოს.

ქუთაისის საკრებულოს თავმჯდომარე ნიკოლოზ ლატარია კი არ გამორიცხავს, რომ ნანა კოსტავა პარტია „კონსერვატორებიდან“ გარიცხონ. ლატარიას თქმით, ამის შესახებ ის პარტიის ლიდერს, ზვიად ძიძიგურს უკვე ესაუბრა.

საკრებულოს უმრავლესობის წევრები სამოქალაქო აქტივისტებსაც შეხვდნენ. როგორც, მმართველი გუდნის დეპუტატები ამბობენ, ისინი არ ეთანხმებიან კოსტავას სიძულვილის ენის შემცველ განცხადებებს, მაგრამ არ აქვთ ბერკეტი, საკრებულოს მანდატი ძალით დაატოვებინონ. მათი თქმით, თუ ნანა კოსტავა მიიჩნევს, რომ ცოდვა ჩაიდინა, ის მართლმადიდებელია და ეკლესიაში მოინანიებს ჩადენილს.

ცნობისთვის, ნანა კოსტავამ სოციალურ ქსელში სხვადასხვა დროს სიძულვილის ენის შემცველი განცხადებები გააკეთა ჟურნალისტ სალომე ბარკერსა და მაია ასათიანზე.