"ეს არის ერთი ჯგუფი, ერთნაირად მოწყობილი ტვინით" - ოპოზიცია პრეიზიდენტის ადმინისტრაციის განცხადებას ეხმაურება

პოლიტიკა - 19:23, 04 Jun, 2019

1046

პრეზიდენტის პრესსპიკერის მიერ გაკეთებულ განცხადებას იმის შესახებ, რომ პრეზიდენტის გარეჯში ჩასვლა და იქიდან გაკეთებული საჯარო განცხადებები ქვეყნის მთავრობასთან იყო შეთანხმებული ხელისუფლების ოპონენტები ეხმაურებიან.

”ევროპული საქართველოს” გენერალური მდივანი, გიგი უგულავა ამბობს, რომ პრეზიდენტი და მთავრობა ერთი მთლიანი მთლიანი ჯგუფია.

„პრესსპიკერის დღევანდელი განცხადება იყო, ნაწილობრივ, ბურთის გადაგდება და მთავრობაზე შეტენვა, თუმცა ისევ ვიმეორებ, საქართველოში არ მოიძებნება ადამიანი, რომელიც სალომე ზურაბიშვილის რაიმე ფორმით გამოყოფს როგორც ცალკე ინსტიტუტს ან ცალკე პოლიტიკოსს "ქართული ოცნებისგან". ეს არის ერთი ჯგუფი, ერთნაირად მოწყობილი ტვინით. ნაწილობრივ, ხშირად არის ეს მავნებლობა, ხშირად არის ეს უვიცობა, რომელიც საბოლოო ჯამში მიდის იქამდე, რომ ჩვენი ქვეყნის პარტნიორები ჩვენ აღარ გვცემენ პატივს, მტრებს ჩვენი აღარ ეშინიათ,“ - აცხადებს გიგი უგულავა.

პრეზიდენტისა და მთავრობის შეთანხმებულად მოქმედებაზე საუბრობს პარლამენტის ფრაქცია ”ნაციონალური მოძრაობის” თავმჯდომარე. რომან გოცირიძის თქმით, სალომე ზურაბიშვილი და მთავრობა ახლა ვითარებიდან გამოსავალს ეძებენ.

„ამ ყაიდის პრეზიდენტს არ აქვს საგარეო საკითხებში მოლაპარაკების წარმართვის უფლება, მთავრობის ნებართვის გარეშე. თუკი მან ეს გააკეთა, ეს უკვე არის იმპიჩმენტის თემა. როგორც ჩანს, რაღაც გამოსავალს ეძებენ და მთავრობა და პრეზიდენტი შეთანხმდნენ, რომ მისი ეს განცხადებები არ ყოფილიყო რაღაც თვითნებობა, რომელმაც შექმნა სერიოზული დაძაბულობა და პასუხისმგებლობა, ბუნებრივია, რომ ეკისრება ამ შემთხვევაში ხელისუფლებას და ხელისუფლება ინაწილებს სალომე ზურაბიშვილის პასუხისმგებლობას და გარკვეულწილად, როგორც ჩანს, გადაეფარა მას,“ - განაცხადა რომან გოცირიძემ.