დააყენებს თუ არა შსს იოსებ სიგუას პასუხისმგებლობის საკითხს ხორავას ქუჩის საქმეზე - "თანამდებობის პირები ჩვენების მიცემის დროს იტყუებოდნენ"

პოლიტიკა - 15:17, 04 Jun, 2019

1244

მიხეილ კალანდიას დაკავებას პოლიტიკოსები აფასებენ. ახალგაზრდას გამოძიება დავით სარალიძის ჯგუფურად დამამძიმებელ გარემოებებში ჩადენილი მკვლელობას ედავება.

ოპოზიციაში ამბობენ, რომ ხელისუფლებას არ ეყოფა პოლიტიკური ნება, რომ დასაჯოს ის მაღალჩინოსნები, რომლებზეც ხორავას ქუჩის საქმეზე შექმნილმა საგამოძიებო კომისიამ რეკომენდაცია გასცეს.

გაერთიანებული ოპოზიციის "ძალა ერთობაშიას" ერთ-ერთი ლიდერის ზურაბ მელიქიშვილის თქმით, ხელისუფლება შინაგან სამეთა და პროკურატურის იმ მაღალჩინოსნებს, რომლებიც საქმეში ფიგურირებენ, პოლიტიკურ დავალებებს აძლევს და აკეთებინებს.

ასეთ პირად მელიქიშვილი იოსებ სიგუას ასახელებს, რომელიც ახლა მარნეულის სამმართველოს უფროსია და ოპოზიციის ინფორმაციით, ის არჩევნების გაყალბებაში პირადად იყო ჩართული.

"წელიწადნახევრის განმავლობაში კონკრეტული თანამდებობის პირები ჩვენების მიცემის დროს იტყუებოდნენ და რა თქმა უნდა, მათი პასუხისმგებლობის საკითხი უნდა დადგეს, მაგრამ დააყენებს თუ არა ხელისუფლება მათი პასუხისმგებლობის საკითხს, მაგალითად, შინაგან საქმეთა სამინისტროს დეტექტივების სამმართველოს ყოფილი უფროსი იოსებ სიგუა, ამ ადამიანს პასუხისმგებლობის საკითხს როგორ დააყენებს, როდესაც მარნეულში ახლა არჩევნებზე, თითქმის, ყველა უბანზე არბენინებდა, თითქმის, გაყალბების ყველა იმ სქემაში ჰყავდა შეყვანილი, რომლითაც ისინი მოქმედებენ. ხელისუფლება მთლიანობაში წარმოადგენს ერთ დიდ ზონდერჯგუფს, ბუნებრივია, კონკრეტული შემსრულებლები სჭირდება, მათ შორის მათზე დამოკიდებული იმიტომ, რომ ჩვენებაშეცვლილ სიგუას რასაც უნდათ, იმას გააკეთებინებენ, ოღონდ ის ციხეში არ აღმოჩნდეს,“ - განაცხადა „ნაციონალური მოძრაობის“ წევრმა, ზურაბ მელიქიშვილმა.