ქუთაისის საკრებულოს "ქართული ოცნების" წევრს ნანა კოსტავას უკვირს, რატომ არის დიდი ინტერესი "პროვინციაში მცხოვრები ნანა კოსტავას მიმართ".

საკრებულოს წევრმა "ნიუპოსტთან" არ დააკონკრეტა, გრძნობს თუ არა მორალურ პასუხისმგებლობას მის მიერ სიძულვილის შემცველი სტატუსების გამო და თქვა, რომ ქვეყანაში უფრო დიდი პრობლემებია.

"პირდაპირ იერიშზე რომ მოდიხართ, უნდა გამეცნოთ. მომისმინე ჩემო საყვარელო, ერთი პროვინციაში მცხოვრები ნანა კოსტავასთვის ნუ დაკარგავთ ამდენ დროს. გარეჯი გვაქვს დასაბრუნებელი, ტერიტორიები გვაქვს დასაბრუნებელი. მისახედი გგვაქვს ქვეყნისთვის, ასაღორძინებელი გვაქვს ეკონომიკა, ჩვენი ქვეყანა გასაძლიერებელია და მოდი ამაზე ვიფოქროთ. სენსაციებზე ნუ ააწყობთ ყველაფერს"- აღნიშნა კოსტავამ.

ნანა კოსტავამ სოციალურ ქსელში სხვა და სხვა დროს არაეთიკური განცხადებები გააკეთა ჟურნალისტ სალომე ბარკერსა და მაია ასათიანზე. ასევე, ზუგდიდში მერის არჩევნების დღეს ერთ-ერთი უბნიდან დეპუტატ თინა ბოკუჩავას ძალით გამოყვანისთვის მან პოლიციელები შეაქო.