„მასთან ერთად არ ვაპირებ მუშაობას...“ – „ოცნების“ ქუთაისის საკრებულოს თავმჯდომარე ნანა კოსტავას პროტესტს უცხადებს და პოსტიდან წასვლას გეგმავს

პოლიტიკა - 13:16, 03 Jun, 2019

765

ნანა კოსტავა, საზოგადოების მოთხოვნის მიუხედავად დეპუტატის მანდატს არ თმობს. კოსტავა "ნიუპოსტის" სატელეფონო ზარებს დილიდან არ პასუხობს.

ქუთაისის საკრებულოს თავმჯდომარემ ნიკა ლატარიამ კი დღეს თქვა, რომ იმ შემთხვევაში კი, თუ კოსტავა უარს იტყვის საკრებულოდან წასვლაზე ის თავად დატოვებს "ქართული ოცნების"ფრაქციას, რომლის წევრიც ნანა კოსტავასთან ერთად არის.

"საკრებულოს არ აქვს ბერკეტი, რომ მას დაატოვებინოს მანდატი. მან უკვე დატოვა ფრაქციის თავმჯდომარის პოსტი. ჩვენ ერთად ვიყავით ამ ფრაქციაში, მაგრამ მე ვთქვი რომ მასთან ერთად არ ვაპირებ საკრებულოში მუშაობას, შესაბამისად შეიკრიბება ფრაქცია და გადავწყვეტთ მე დავტოვებ თუ ის"-განაცხადა ლატარიამ.

ქუთაისის საკრებულოში ქართული ოცნების დეპუტატმა, ნანა კოსტავამ Facebook-ზე სოციალური მედიის მენეჯერის, სალომე ბარკერის ვიდეო გააზიარა წარწერით: “კაი დღეში ხარ ახლა, იცინე!” საკრებულოს წევრის მიერ ვიდეოს ამ აღწერით გაზიარება დროში ბარკერის დის გარდაცვალებას დაემთხვა.

დეპუტატის წინააღმდეგ, რომელიც არაეთიკური პოსტებით გამოირჩევა, მოქალაქეებმა ხელმოწერების შეგროვება დაიწყეს. ხელმომწერები მისთვის უფლებამოსილების შეწყვეტას მოითხოვენ.