"შერატონ მეტეხი პალასში" ნინო ბურჯანაძის პარტიის "დემოკრატიული მოძრაობა - ერთიანი საქართველოს” რიგგარეშე ყრილობა გაიმართა

პოლიტიკა - 17:05, 02 Jun, 2019

575

"შერატონ მეტეხი პალასში" ნინო ბურჯანაძის პარტიის რიგგარეშე ყრილობა გაიმართა, რომელზეც პარტიას სახელწოდება შეეცვალა და დღეიდან "დემოკრატიული მოძრაობა - ერთიანი საქართველო” ეწოდა.

ყრილობაზე ასევე პარტიის პოლიტიკურ მიზნებისა და ამოცანების შესახებ ისაუბრეს. "დემოკრატიული მოძრაობა - ერთიანი საქართველოს” ლიდერების განცხადებით, ისინი მომხრე არიან საქართველოს ევროკავშირში გაწევრიანების, თუმცა აცხადებენ, რომ დაუშვებელია ქვეყნის ტერიტორიაზე ნებისმიერი უცქო ქვეყნის ბაზების არსებობა.

„ჩვენ უარს ვამბობთ იმ კორუმპირებულ ხელისუფლებაზე, რომელიც ჩამოყალიბდა საქართველოში, უარს ვამბობთ იმ უმუშევრობაზე, იმ სოციალურ უთანასწორობაზე, რაც ჩამოყალიბდა ეს ბოლო წლებია საქართველოში, განსაკუთრებით, ამ ბოლო ხანში გამოჩნდა და რა თქმა უნდა, ჩვენთვის უმთავრესია ევროკავშირი, ევროკავშირში გაერთიანება, თუმცა ასევე, ჩვენ წინააღმდეგი ვართ ნებისმიერი უცხო ქვეყნის ბაზების საქართველოში და ყველაფერს გავაკეთებთ იმისათვის, რომ რუსული ბაზები გავიდნენ საქართველოდან. ამისთვის საჭიროა პირდაპირი მოლაპარაკებები, ამისათვის საჭიროა მრავალვექტორული დაბალანსებული ურთიერთობები“ - განაცხადა გიგლა ბარამიძემ.

"დემოკრატიული მოძრაობა - ერთიანი საქართველოს” პოლიტიკური საბჭოს წევრი, ანზორ ბიწაძის განცახდებით, პარტიის ლიდერები საქართველოს ყველა რეგიონში მოაწყობენ რომ კონფერენციების მიზანია, ამომრჩეველს ესაუბრონ იმის შესახებ, თუ რა ცვლილებებია ქვეყნისთვის უმთავრესი.

„ამ კონფერენციების დანიშნულება, პირველ რიგში, იქნება ის, რომ პირდაპირ ურთიერთობაში შევიდეთ ჩვენს ამომრჩეველთან, პირდაპირ გავაგებინოთ ხალხს, რა ცვლილებებია ქვეყანაში სასწრაფოდ საჭირო. მთავარი პოლიტიკურ გზავნილი არის ერთიანი საქართველო, ეს არის ის უმთავრესი მესიჯი, რაც გახლავთ ჩვენი დღევანდელი შეკრების. დღეს, საქართველოს სჭირდება ერთიანობა, ტერიტორიული მთლიანობა და საზოგადოების ერთიანობა უკეთესი ცვლილებებისთვის,“ - განაცხადა ანზორ ბიწაძემ.

”დემოკრატიული მოძრაობა - ერთიანი საქართველოს” მთავარი საბჭოს წევრი, გიორგი ახვლედიანი, პრობლემების მოგვარების გზად, რუსეთთან დიალოგს ასახელებს.

„ლაკონურად რომ ვთქვათ, ეს არის მზადება ეროვნული სახელმწიფოს ჩამოსაყალიბებლად. ეს არის მოცემულობა, რომელიც ჩვენი ქვეყნისთვის არის გარდაუვალი აუცილებლობა, ვესაუბროთ ყველაზე უხერხულ მეზობელს ოკუპანტს, მტერს, მაგრამ უნდა ვესაუბროთ, უნდა ვესაუბროთ იმისათვის, რომ ჩვენი ქვეყნის პრობლემები მოვაგვაროთ. ჩვენ ვხედავთ, რომ 25 წელიწადია ვტკეპნით ერთ ადგილს და უკან უკან მივდივართ. ერთადერთი საშუალება იმისათვის, რომ ეს პრობლემები მოგვარდეს, არის ვესაუბროთ იმათ, სადაც არის შესაძლებელი ამ პრობლემების მოგვარება დაიწყოს,“ - განაცხადა გიორგი ახვლედიანმა.