პრემიერ-მინისტრმა მამუკა ბახტაძემ ონსა და ამბროლაურში მიმდინარე ინფრასტრუქტურული პროექტები დაათვალიერა. იგი რაჭა-საჩხერე-ონის გზის პროექტის მიმდინარეობით ​დაინტერესდა, მოინახულა რამდენიმე ობიექტი, მათ შორის რაჭული ლორის საწარმო და სოფელ გოგოლათში ადგილობრივ მოსახლეობას შეხვდა.

„ამ სოფელში არის ათეული ასეთი სახლი, სადაც არის შენარჩუნებული უნიკალური ქართული არქიტექტურა და უნიკალური ქართული ორნამენტები. აქ რომ ჩამოხვალ, შეუძლებელია ამ ყველაფერს შეხედო ემოციის გარეშე. ეს არის უდიდესი კულტურის მაჩვენებელი ის პროექტები, რომლებიც დავიწყეთ შარშან, ის მიმდინარეობს წარმატებით. მე დღეს ვიყავი ორივე მუნიციპალიტეტში, როგორც ონში, ასევე ამბროლაურში, ძალიან კარგი ტემპებით მიმდინარეობს ინფრასტრუქტურული პროექტები. ჩემთვის ძალიან მნიშვნელოვანი იყო ამავე დროს ის, რომ რაჭაში ჩვენ შევძელით ტურისტების რაოდენობის მკვეთრი ზრდა. უკვე 160 საოჯახო სასტუმრო ფუნქციონირებს რაჭაში და ეს არის მხოლოდ დასაწყისი“ - განაცხადა მამუკა ბახტაძემ.