ივანიშვილ-ჩხარტიშვილის ინტერესები ანაკლიისა და ფოთის პორტში საქმეში - "ეს ტექნიკური შეცდომა არ ყოფილა, ამ კლანს ღრმად აქვს ფესვები გადგმული ბიუროკრტიაში"

პოლიტიკა - 19:47, 30 May, 2019

1302

"ევროპული საქართველოს" დეპუტატი ზურაბ ჭიაბერაშვილი ანალიისა და ფოთის პორტებთან დაკავშირებით შექმნილ სახელისუფლებო კრიზისს ეხმაურება.

ოპოზიციონერის თქმით, ანაკლიის და ფოთის პორტების საქმეში ბიზნესმენ ვანო ჩხარტიშვილის ინტერესები იკვეთება და ფოთის პორტისთვის ნებართვის გაცემა ტექნიკური შეცდომა არ ყოფილა და მის უკან ბიძინა ივანიშვილი და ჩხარტიშვილი დგანან:

"ვფიქრობ, რომ ვანო ჩხარტიშვილი უშუალოდ არის დაკავშირებული ფოთის პორტის ამბებთან და ის არსებული ფოთის პორტის გაფართოებას ლობირებს.

თავიდანვე, როდესაც კვირიკაშვილის პრემიერობიდან წასვლის შესახებ საზოგადოება ალაპარაკდა, რეალურ მოტივად დასახელდა ის უთანხმოება, რაც მთავრობაში არსებობდა ვანო ჩხარტიშვილის დაჯგუფებასა და იმ ხალხს შორის, ვისაც მიაჩნდა, რომ ანაკლიის პორტის მშენებლობა უნდა შედგეს და განხორციელდეს. როგორც მომდევნო მოვლენებმა გვაჩვენა, როგორც კვირიკაშვილის წასვლამ ხელისუფლებიდან, ისე მამუკა ხაზარაძის, ანუ ანაკლიის კონსორციუმის თავს გადახდენილმა მოვლენებმა კარგად აჩვენა, რომ მართლაც, ბიძინა ივანიშვილმა მხარი დაუჭირა ჩხარტიშვილს და მხარი დაუჭირა იმ ადამიანებს, რომლებიც ლობირებენ ფოთის პორტს.

შესაბამისად, ეს ბოლო ეპიზოდიც გაგრძელებაა ამ ისტორიის და კარგად აჩვენებს, რომ ეკონომიკის სამინისტროს რომელიღაცა ქვეუწყების ხელმძღვანელის დონეზე დაშვებული ტექნიკური შეცდომა ეს არ არის. აქ ვხედავთ, რომ ბიძინა ივანიშვილის და ვანო ჩხარტიშვილის კლანს ღრმად აქვთ ფესვები გადგმული ბიუროკრატიაში"- აღნიშნავს ჭიაბერაშვილი.