ფოთის პორტის სკანდალში ისნის რაიონის მაჟორიტარი, დამოუკიდებელი დეპუტატი დავით ჭიჭინაძე მინისტრის პასუხისმგებლობას ხედავს.

„თუ ამ ქვეყანაში ყველა დეპარტამენტის უფროსს თავისი ინტერესი აქვს და მინისტრი ვერ აკონტროლებს, ეს მინისტრის ბრალია. ეკონომიკის სამინისტრო სამინისტრო კი არა, არამედ კერძო ინტერესების კორპორაციაა, სადაც საქმიანობა მხოლოდ კერძო ინტერესებით ხდება და არ ხდება სახელმწიფო და ეკონომიკური პოლიტიკის გატარება. ამის ნათელი დასტური ისაა, რომ 2 მაისს გაცემული ბრძანება მინისტრისთვის ხელმისაწვდომი ახლა აღმოჩნდა,“- აცხადებს ჭიჭინაძე.

რაც შეეხება ფოთის პორტს, ჭიჭინაძის თქმით, ჯერ კიდევ შევარდნაძის დროს იყო გაცხადებული, რომ ფოთის პორტში უნდა აშენებულიყო ღრმაწყლოვანი პორტი. შემდეგ კი გაჩნდა ანაკლია.

„ისეთი შთაბეჭდილება მექმბება, რომ ყველანაირი მცდელობა მიდის, რათა ანაკლიის პორტი არ აშენდეს. წარმოიდგინეთ ინვესტორების მდგომარეობა, რომლებსაც 21 მაისს ხვდებიან და, თურმე, 2 მაისს არის გადაწყვეტილება მიღებული და ამას უმალავენ. ამით, როგორც საინვესტიციო ქვეყანა, საკუთარ თავს თვითლიკვიდაციას ვუკეთებთ, რადგან ნებისმიერ ინვესტორს სტაბილურობა და გარანტიები სჭირდება. ჩვენ კი გადაწყვეტილებებში სტაბილურები არ ვართ და ისე ჩანს, რომ ამ ამბის გახმაურების შემდეგ მთავრობამ უკან დაიხია“, - აცხადებს დავით ჭიჭნაძე.

მისივე თქმით, ნათია თურნავას „მსგავსი მინისტრები ჩვენს მინისტრთა კაბინეტში, პრაქტიკულად, 90 პროცენტია და მათ მხოლოდ კონკრეტული ჯგუფების ინტერესების გატარების დავალება აქვთ.“