„პრემიერ საპირფარეშოში არ გადის ისე, ივანიშვილთან ორჯერ თუ არ გაიარა საკითხი... პანიკაში ჩავარდნენ“

„პრემიერ საპირფარეშოში არ გადის ისე, ივანიშვილთან ორჯერ თუ არ გაიარა საკითხი... პანიკაში ჩავარდნენ“ - ფადი ასლი ფოთის პორტის სკანდალზე

პოლიტიკა - 15:13, 30 May, 2019

1519

„აგროტექნიკ ჰოლდინგის” ხელმძღვანელი, ფადი ასლი ამბობს, რომ ფოთის პორტის საკითხის საზოგადოებაში გაჟონვის შემდეგ, საქართველოს ხელისუფლებამ უფრო მეტი შეცდომა დაუშვა.

მისი თქმით, მთავრობა პანიკაშია.

ფადი ასლის განცხადებითვე, იმ ფონზე, როდესაც პრემიერი ყველა ნაბიჯს უთანხმებს ბიძინა ივანიშვილს, არავის სჯერა, რომ რიგითი დეპარტამენტის ხელმძღვანელმა თვითნებური გადაწყვეტილებები მიიღო.

„როდესაც ახალი პორტის მშენებლობის ფაქტმა საზოგადოებაში გაჟონა, მიხვდნენ, რომ გამოუსწორებელი შეცდომა დაუშვეს და პანიკაში ჩავარდნენ. არაკომპეტენტურობის ახალი რეკორდი დაამყარა საქართველოს ხელისუფლებამ. პრემიერ-მინისტრი საპირფარეშოში არ გადის ისე, ბიძინა ივანიშვილთან ორჯერ თუ არ გაიარა საკითხი და ახლა გვეუბნებიან, რომ ეკონომიკის სამინისტროს ერთ-ერთი დეპარტამენტის ხელმძღვანელი ისე დებს ხელშეკრულებას ერთ-ერთ უმსხვილესს ოპერატორთან, რომ ეს ბიძინა ივანიშვილმა არ იცოდა? ამათ ჰგონიათ, რომ ხალხი სულელია და ყველაფერს დაიჯერებს. ეს არის უდიდესი სირცხვილი. ნათია თურნავა ძალიან მეცოდება, რადგან მან პირადად ივანიშვილისგან მიიღო დავალება ეთქვა ის, რაც თქვა. მეორე მხრივ, კი არ შეიძლება მსხვილ ინვესტორებთან ასე თამაში. ერთ დღეს აძლევ ნებართვას, მეორე დღეს უჩერებს ხელშეკრულებას, თუმცა სამწუხაროდ ეს ამ მთავრობისთვის დამახასიათებელია - არაპროფესიონალიზმის უმაღლესი გამოვლინება და სანამ ბიძინა ივანიშვილი იქნება ხელისუფლებაში, ჩვენ ასეთი ფაქტების წინაშე ყოველდღიურად დავდგებით,”-განაცხადა ფადი ასლიმ.

შეგახსენებთ, რომ მას შემდეგ, რაც ცნობილი გახდა ფოთში ღრმაწყლოვანი პროექტის მშენებლობის ნებართვის გაცემის თაობაზე, ეკონომიკის მინისტრმა განაცხადა, რომ მან ამის შესახებ არაფერი იცოდა. იმ სააგენტოს უფროსი კი ვინც ნებართვა გასცა თანამდებობიდან გაათავისუფლეს, მშენებლობის ნებართვა კი შეაჩერეს.