„ვინც ეს დოკუმენტი გასცა, არ შეიძლება, არ სცოდნოდა, რომ ანაკლიის პროექტს აფეთქებდა“

„ვინც ეს დოკუმენტი გასცა, არ შეიძლება, არ სცოდნოდა, რომ ანაკლიის პროექტს აფეთქებდა“ - ექსპერტები სამთავრობო სკანდალზე

პოლიტიკა - 13:21, 30 May, 2019

1019

ექსპერტი გია ხუხაშვილი ფოთის პორტის მშენებლობის ნებართვის გაცემას ეხმაურება და ამბობს, რომ არ შეიძლებოდა მას, ვინც ეს დოკუმენტი გასცა, არ სცოდნოდა, რომ ამ დოკუმენტით ანაკლიის პროექტს ააფეთქებდა.

„დაეცდიათ ამათთვის, რომ ინვესტორები შემოეკრიბათ, ფინანსური პაკეტი შეეკრათ და მერე გამოეცხადებინათ. რატომ გახდა საჭირო ფოთის პორტზე ამ ნებართვის გაცემა ზუსტად იმ ეტაპზე, როდესაც უნდა დასრულებულიყო ანაკლიის ფინანსური პაკეტის შეკვრა,“-ამბობს ხუხაშვილი.

საგამომცემლო სახლის „Forbes Georgia“-ს მთავარი რედაქტორი გიორგი ისაკაძე ამბობს, რომ დოკუმენტი, რომელიც ეკონომიკის სამინისტრომ გასცა და რომელიც ფოთის პორტის მშენებლობის ნებართვას გულისხმობდა, ანაკლიის პორტის მნიშვნელობას ანულებდა.

„ეკონომიკური დასაბუთება ორი ღრმაწყლოვანი პორტის არსებობის შესახებ ფაქტობრივად არ არის და რაც ყველაზე მნიშვნელოვანია, მოლაპარაკებას როცა მართავ მხარესთან და მეორე ხელით აკეთებ და იღებ გადაწყვეტილებას, რომელიც სრულად შეიყვანს ჩიხში ანაკლიის თემას, ვერ წარმომიდგენია აქ როგორ შეიძლება რაიმე სწორად დალაგდეს,“- აცხადებს გიორგი ისაკაძე.

მისი თქმით, ეკონომიკის მინისტრის გადაწყვეტილება, რომლის მიხედვითაც მან ნებართვის გამცემი სააგენტოს ხელმძღვანელი თანამდებობიდან გადააყენა სწორია, თუმცა გამოიკვეთა, რომ სახელმწიფო სტრუქტურებს შორის კოორდინაცია არ არსებობს.

შეგახსენებთ, ახალი ღრმაწყლოვანი პორტის მშენებლობის დოკუმენტი, რომელიც ანაკლიის პორტის პერსპექტივას კლავს გაუქმებულია.

ეკონომიკის მინისტრის განცხადებით, ნებართვა მშენებლობისა და ტექნიკური ზედამხედველობის სააგენტომ გასცა და ის საქმის კურსში არ იყო. მინისტრის თქმით, ნებართვა გაუქმებულია, ხოლო სააგენტოს ხელმძღვანელი გათავისუფლებული.