"განევროზებული ჩვენი მოქალაქეები, ვერ იკავებენ თავს, პატარა კამათისთვის ოჯახები ინგრევა... რამდენი ოჯახი გადაარჩინა დანგრევას კომუნისტურმა წყობამ"- ემზარ კვიციანი

პოლიტიკა - 20:15, 29 May, 2019

1118

პარლამენტის პლენარულ სხდომაზე სადაც “ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ” კანონში ცვლილებების პროექტს განიხილავდნენ, სიტყვით ემზარ კვიციანიც გამოვიდა. დეპუტატის შეფასებით, იმის გამო რომ განქორწინების პროცედურა გამარტივებულია, უფრო მეტი ოჯახი ინგრევა. კვიციანის თქმით, კომუნისტურმა რეჟიმმა არაერთი ოჯახი გადაარჩინა დანგრევას, რადგან განქორიწნების ვადა 6 თვეზე მეტხანს გრძელდებოდა:

"ოჯახური ძალადობა, რომელიც ყველგან არსებობს, ადამიანი ძალადობაზე ისედაც ხომ ისჯება?! რატომღაც, თითიდან გამოწოვილივითაა, რომ სახელმწიფო ოჯახში ძალიან ერევა. რაც უფრო მეტად ერევა სახელმწიფო ოჯახში, მით მეტი ოჯახები ინგრევა. გასაგებია ის, რომ ცოლ-ქმარი ერთმანეთში თუ იკამათებენ და იჩხუბებენ, გვაქვს ისეთი კანონი, რომ ხუთ დღეში ხელში ჩავახუტებთ განქორწინებას. სახელმწიფოს მხრიდან ესეც ხელშეწყობაა. ძალიან კარგად გვახსოვს, რამდენი ოჯახი გადაარჩინა დანგრევას და განადგურებას კომუნისტურმა წყობამ. 6 თვე ხომ ჰქონდა წყვილს საფიქრალი, ამის შემდეგ სასამართლო 2 თვეს უმატებდა იმისთვის, რომ იქნებ, შერიგდეთ და ბავშვები მშობლების გარეშე არ დატოვოთო. ყველაფერს აკეთებდნენ იმისთვის, რომ ოჯახი შენარჩუნებულიყო. ჩვენს ქვეყანაში ყველაფერი კეთდება იმისთვის, რომ ოჯახი დაინგრეს. მოკლედ, გასაკვირია ასე რატომ ხდება. სად არ ხდება, კამათი, ჩხუბი, ძალადობა?! ეს ხომ ისჯება?! ანუ, კონკრეტული კითხვა ის არის, 5 დღეში რატომ ხდება განქორწინების მოწმობის მიცემა. ასე, რომელიმე ქვეყანაშიც არის, კაცო?! რატომ აწყობს ვიღაცას ის, რომ ჩვენთან ოჯახები ინგრეოდეს?! რატომ არ შეიძლება ის, რომ 2 თვე მაინც ჰქონდეთ ფიქრისთვის ადამიანებს?! გაცხარებული, კავკასიელი ცოლ-ქმარი რომ მივა იუსტიციის სახლში, იმათ 5 დღე ეყოფა დასამშვიდებლად?! თუ რომელიმემ არ შეიტანა განცხადება და არ თქვა უარი განქორწინებაზე, 5 დღეში აძლევენ განქორწინების საბუთს. იმ ცხრაწლიანი რეჟიმის შემდეგ განევროზებული ჩვენი მოქალაქეები, რომლებიც ვერ იკავებენ თავს, პატარა კამათის გულისთვის ოჯახები რომ ინგრევა, აქ რანაირად იცავს სახელმწიფო ამ ოჯახებს დანგრევისაგან?“ - განაცხადა კვიციანმა.