„ერთიანი ნაციონალური მოძრაობის“ პოლიტსაბჭოს თავმჯდომარე ნიკა მელია საპარლამენტო უმრავლესობის მიერ თემირლან მაჩალიკაშვილის საქმეზე საგამოძიებო კომისიის შექმნის ინიციატივის ჩაგდება საპარლამენტო ტრიბუნიდან გააპროტესტა.

"მოსულიყო ყველა და საგამოძიებო კომისიაზე ესაუბრა, მთელ ქვეყანას გაეგო, რატომ დაიღუპა ბავშვი ლოგინში, თუმცა ეს არ გინდოდათ იმიტომ, რომ ბიძინა ივანიშვილს უწევთ ანგარიშს, გეშინიათ"- მიმართა დეპუტატმა უმრავლესობას.

მელიას თქმით, ვინც მაჩალიკაშვილის საქმეზე საგამოძიებო კომისიის შექმნას არ დაუჭირა მხარი მათ ეს გადაწყვეტილება წინ დახვდებათ.

„არაფერს არ გეტყვით, ვინაიდან თქვენთან საუბარი არის შეურაცხმყოფელი ამირედან და პირობას გაძლევთ, რომ გავა წლები და თითოეულ თქვენგანს, ვინც ხმა არ მიეცით მაჩალიკაშვილის საქმეზე საგამოძიებო კომისიის შექმნას, წინ დაგხვდებათ. ძალიან ბევრი მოქალაქე გაგახსენებთ ამას, იქნება ეს ქუჩაში, იქნება ეს სხვა სამსახური, სადაც მოეწყობით, იქნება ეს მეზობელი... ყბადაღებული თემაა, რომ თითქოს სინამდვილეში არ იცით რა ხდებოდა და ამიტომ არ გინდათ, საგამოძიებო კომისიის შექმნა. მხოლოდ ხელფასს იღებთ ამ პარლამენტში, უმეტეს თქვენგანს მარტო მანქანა და რესტორნებში სიარული გაინტერესებთ,“ - განაცხადა ნიკა მელიამ.