"საქართველოში რუსეთის მიერ აღმართული კედლები იგივე ბედს გაიზიარებს" - ციხელაშვილმა მავთულხლართები ბერლინის კედელს შეადარა

პოლიტიკა - 11:57, 29 May, 2019

800

საქართველოს სახელმწიფო მინისტრმა შერიგებისა და სამოქალაქო თანასწორობის საკითხებში, ქეთევან ციხელაშვილმა პორტუგალიის ქალაქ კაშკაიშში, საერთაშორისო კონფერენციაზე - "ESTORIL CONFERENCES – GLOBAL CHALLENGES, LOCAL ANSWERS", საქართველო ოკუპირებულ ტერიტორიებზე არსებულ მძიმე ვითარებაზე და პოსტსაბჭოთა ქვეყნების მიმართ რუსეთის პოლიტიკაზე ისაუბრა. ციხელაშვილმა საქართველოს ოკუპირებულ ტერიტორიებზე რუსეთის მიერ მავთულხლართების აღმართვა ბერლინის კედლის მშენებლობას შეადარა და განაცხადა, რომ რუსეთს მიზანია ყველანაირად ხელი შეუშალოს იმ ქვეყნებს, რომლებიც ევროატლანტიკური სტრუქტურებისკენ ისწრაფვიან.

„ბერლინის კედლის დაცემა ჩვენთვის წარმოადგენს შთაგონების წყაროს, რომ ახალი კედლები რომლებიც საქართველოში რუსეთის მიერ არის აღმართული, იგივე ბედს გაიზიარებს. ეს კედლები არის მართულხლართები, რომლითაც შემოსაზღვრულია რუსეთის მიერ ოკუპირებული ტერიტორიები, აფხაზეთი და სამხრეთ ოსეთის. ისინი გადის ასზე მეტ სოფელზე და ერთმანეთისგან ჰყოფს აქ მცხოვრებ ადამიანებს. გარდა გაყოფისა, მოსკოვი ადგილზე რეგიონის რუსიფიკაციის მცდელობას ახდენს. ყველაზე ცნობილი ხერხი, რომელსაც კრემლი იყენებს უკანონო პასპორტიზაციაა.

მოსკოვს უნდა, რომ ეს მეზობელი ქვეყნები რუსეთის ორბიტაზე დარჩნენ და არ გადაუხვიონ უფრო სასურველი მიზნების მისაღწევად, მაგალითად როგორიცაა ევროკავშირი და ევროატლანტიკური ინსტიტუტები. სწორედ ამიტომ საქართველოსთვის ეს არა მხოლოდ არჩევანი, არამედ თავისუფლებისთვის ბრძოლაა და ამის დათმობას არ ვაპირებთ.“-განაცხადა ციხელაშვილმა.