"დღეს დავით გარეჯს თანადგომა სჭირდება და არა პროვოკაცია!"- დავით ჭიჭინაძე

პოლიტიკა - 16:01, 28 May, 2019

683

პარლამენტის წევრი, ისნის მაჟორიტარი დეპუტატი, დავით ჭიჭინაძე დავით გარეჯში შექმნილ ვითარებას ეხმაურება.

პარლამენტის წევრის შეფასებით, პრეზიდენტის გაუაზრებლმა, თუ განზრახ ნასროლმა ფრაზებმა მიგვიყვანა იმ რეალობამდე, რაც ხდება.

"ეროვნული მოძრაობის პირველი მძლავრი ტალღა საქართველოში, სწორედ დავით გარეჯით დაიწყო. ფაქტია, რომ თავის დროზე, ვერც შევარდნაძის და შემდგომში ვერც სააკაშვილის მმართველობის პერიოდებში, საქართველო-აზერბაიჯანს შორის საზღვრების დადგენა ვერ მოხდა და თემა დაკონსერვდა. თუმცა სამონასტრო ცხოვრება ჩვეულებრივად მიმდინარეობდა და ტურისტებიც თავისუფლად მოძრაობდნენ.

დღეს კი, ერთის მხრივ, არაკეთილმოსურნე ძალებს არ სურთ კავკასიის მასშტაბით დაწყებული უმნიშვნელოვანესი პროექტების განხორციელება, მეორეს მხრივ - ქვეყნის ამჟამინდელი პრეზიდენტის გაუაზრებლმა, თუ განზრახ ნასროლმა ფრაზებმა მიგვიყვანა იმ რეალობამდე, რაც ხდება.

სწორედ ამიტომ, გვრჩება შთაბეჭდილება, რომ დავით გარეჯის სამონასტრო კომპლექსის და საქართველო-აზერბაიჯანის საზღვართან დაკავშირებით, საქმე უკიდეგანო უვიცობასთან გვაქვს, რამაც უკვე თავის მხრივ, ბევრი უსარგებლო იდიოტი და პროვოკატორი გამოიყვანა ავანსცენაზე.

ამას კი, ხშირ შემთხვევაში მივყავართ არა პოლიტიკურ-დიპლომატიური დისკუსიამდე, არამედ პროვოკაციებამდე, რომლითაც სარგებლობს ის ქვეყანა, რომლის ფუძემდებლებმაც - ორჯონიკიძეებმა, საქართველოს საზღვრები თავის დროზე, ქართველი ერის უკითხავად ჩაასწორეს.

ამ ფონზე ყველაზე დროული სწორედ საქართველოს კათალიკოს-პატრიარქის განცხადება იყო, რომელმაც თვალნათლივ და ზუსტად დაგვანახა პრობლემის მტკივნეული და სახიფათო მხარეები.
დავით გარეჯი კი, ისევე როგორც ასურელი მამების მიერ შექმნილი სამონასტრო ცენტრები, ქართული კულტურის და რელიგიის განუყოფელი ნაწილია

იმედი გვინდა ვიქონიოთ, რომ ქვეყანაში არსებობენ ხელისუფლების სხვა შტოებიც, რომელთა ვალიცაა (თუ რაღა თქმა უნდა, ისინიც არ არიან ჩართული ამ პროვოკაციულ დომხალში), მყისიერად მოაგვარონ არსებული პრობლემა, რომელიც წლების მანძილზე ჩვენი მთავრობების უპრინციპობის და ენის მოჩლექვის პოზიციითაა განპირობებული.

მოკლედ, დღეს დავით გარეჯს თანადგომა სჭირდება და არა პროვოკაცია!

დაუშვებელია ურაპატრიოტიზმითა და გაუაზრებელი გამოხტომებით, ვინმეს მიეცეს უფლება, ორი მეზობლის ურთიერთობა კითხვის ნიშნის ქვეშ დაყენოს"- ნათქვამია დავით ჭიჭინაძის განცხადებაში.