ჭიათურის მაღაროელებს ხელფასები დიდი დანაკლისით ჩაერიცხათ - შესრულდება თუ არა მაღაროელებთან დადებული პირობა

პოლიტიკა - 15:32, 28 May, 2019

1009

ჭიათურის მაღაროელთა მხრიდან კომპანიასთან შემდგარ შეთანხმებას ეხმაურება ჭიათურის პირველადი პროფკავშირული ორგანიზაცია. როგორც განცხადებაშია აღნიშნულია, მაღაროელებს ხელფასები დიდი დანაკლისით ჩაერიცხათ.

“ჭიათურაში გაფიცვა შეწყდა, გაფიცული მაღაროელები დღეიდან დაუბრუნდნენ სამუშაო ადგილებს. ბრძოლის მეორე ფაზა წინაა, დღეს მაღაროელებს ხელფასები ჩაერიცხათ, მაგრამ როგორც მატყობინებენ, ძალიან დიდი დანაკლისით, ყველას აკლია საკმაოდ დიდი თანხა", - ნათქვამია ჭიათურის პირველადი პროფკავშირული ორგანიზაციის მიერ გავრცელებულ განცხადებაში.

ჭიათურის მაღაროელთა გაფივა გუშინ, მაღაროელებსა და “ჯორჯიან მანგანეზს” შორის მოლაპარაკები შედეგად შეწყდა. არსებული ინფორმაციით, მოთხოვნა ხელფასის 50%-ით მომატების შესახებ დაკმაყოფილდა, თუმცა მატება ეტაპობრივად განხორციელდება. მათ თავდაპირველად 1 ივნისიდან ხელფასი 25%-ით გაეზრდებათ, ხოლო წლის ბოლომდე 10%-ით, ჯამში წლის ბოლომდე მაღაროელებს ხელფასი 35%-ით გაეზრდებათ, დანარჩენი 15% მაღაროელებს ეტაპობრივად მოემატებათ ერთი წლის განმავლობაში.

ამასთან ერთად, მარგანეცით დატვირთული ავტომანქანების გადაადგილება ქალაქში თვენახევრის შემდეგ შეწყდება, რადგან მარგანეცის გადაზიდვა რკინიგზის საშუალებით მოხდება.