ჭიათურაში, სადაც მაღაროელების რამდენიმედღიანმა პროტესტმა მასშტაბური ხასიათი მიიღო და საპროტესტო აქციას რიგითი მოქალაქეები და სკოლის მოსწავლეებიც კი შეუერთდნენ, დღეს ეკონომიკის, ჯანდაცვისა და განათლების მინისტრები ნათია თურნავა, დავით სერგეენკო და ალექსანდრე ბატიაშვილი ჩავიდნენ. გაფიცული მაღაროელების წარმომადგენლებთან შეხვედრა ქალაქის ადმინისტრაციის შენობაში იმართება. შევხედრაში მონაწილეობს ჭიათურის ახლად არჩეული მერი გივი მოდებაძეც. შეხვედრის პარალელურად შენობასთან საპროტესტო აქციის მონაწილეები არიან შეკრებილი.

„ჯორჯიან მანგანეზის“ დაქვემდებარებაში შემავალი ჭიათურის სამთო გამამდიდრებელი კომბინატის დირექტორმა, აკაკი გურჯიძემ თანამდებობა დატოვა. ამის შესახებ განცხადებას კომპანია „ჯორჯიან მანგანეზმა“ გაავრცელა. განცხადებაში ნათქვამია, რომ გურჯიძე სრულად იაზრებს არსებულ ვითარებას და აცხადებს, რომ, შექმნილი სიტუაციიდან გამომდინარე, ეს ყველაზე ოპტიმალური ნაბიჯია.

ჭიათურაში მაღაროელების გაფიცვა მეთერთმეტე დღეა გრძელდება. გაფიცულთა ნაწილი შიმშილობს. მაღაროელები სამუშაო პირობების გაუმჯობესებასა და ხელფასის 50 პროცენტით გაზრდას ითხოვენ. ჭიათურაში დღეს მაღაროელებს მხარდაჭერა გამოუცხადეს სკოლის დირექტორებმა და მოსწავლეებმა.მაღაროელებს სოლიდარობა გამოუცხადეს აკაკი წერეთლის სახელობის თეატრის მსახიობებმაც.