"12 ჭრილობა, არც ერთი მკვლელი! დაუსჯელობა კლავს! ვინ მოკლა სარალიძე!"- არასამთავრობოები სასამართლოსთან აქციას მართავენ

პოლიტიკა - 16:32, 27 May, 2019

1107

12 ჭრილობა, არც ერთი მკვლელი! ნუ წაახალისებ ძალადობას! ვინ მოკლა სარალიძე! დაუსჯელობა კლავს! - ამ შინაარსის ბანერები მიიტანეს დღეს სააპელაციო სასამართლოსთან.
აქციაზე იმყოფება მოკლული არასრულწლოვანის მამა, ზაზა სარალიძეც.

არასამთავრობო ორგანიზაციები საქმეზე სამართლიანი გადაწყვეტილების გამოტანას ითხოვენ.

აქცია რამდენიმე არასამთავრობო ორგანიზაციის მიერ არის ორგანიზებული. მათ შორის არიან: „კონსტიტუციის 42 -ე მუხლი“,“ ახალგაზრდა იურისტები“, „საერთაშორისო გამჭვირვალობა-საქართველო“, „ადამიანის უფლებათა ცენტრი“.

დღეს სააპელაციო სასამართლოში ხორავას ქუჩის მკვლელობის საქმეზე სასამართლო პროცესი 17:00 საათზე გაიმართება. არ არის გამორიცხული, რომ დღესვე განაჩენიც გამოცხადდეს.

"სამწუხაროა, მაგრამ დღესაც შინაგან საქმეთა სამინისტრო და პროკურატურა არ არიან ადეკვატურები 2017 წლის 1 დეკემბერს, თბილისში, ხორავას ქუჩაზე არასრულწლოვანთა მკვლელობის საქმესთან დაკავშირებით, რაზეც ნათლად მეტყველებს ის ფაქტი, რომ, ერთი მხრივ, პროკურატურა მთელი ძალით ცდილობს, გაიტანოს პირვანდელი ბრალდება სააპელაციო სასამართლოში, ხოლო, მეორე მხრივ, ქმედითი ნაბიჯები არ გადადგმულა ძირითადი საქმიდან გამოყოფილ საქმეზე "- აცხადებენ აქციის მონაწილეები.