ბახტაძის დესანტი ჭიათურაში - პრემიერმა ამბოხებული ქალაქის მოსახლეობასთან სასაუბროდ სამი მინისტრი გააგზავნა

პოლიტიკა - 14:13, 27 May, 2019

1195

ჭიათურაში მასობრივი პროტესტის დაწყების შემდეგ, პრემიერმა მამუკა ბახტაძემ სამ მინისტრს მაღაროელებთან ჩასვლა დაავალა. ჭიათურაში ჩადიან ეკონომიკის განათლების და ჯანდაცვის მინისტრები.

მინისტრები მაღაროელებსა და კომპანია „ჯორჯიან მანგანეზს“ შორის მედიაციის პროცესში ჩაერთვებიან.

აღსანიშნავია, რომ ამ დრომდე მინისტრები ჭიათურაში ჩასვლის აუცილებლობას ვერ ხედავდნენ.

„მივიღე დავალება პრემიერ-მინისტრის, მე და ჩემი კოლეგები ჯანდაცვის მინისტრი, განათლების სამინისტრო, უახლოეს საათებში ჩავალთ ჭიათურაში და უშუალოდ დავესწრებით და ჩავერთვებით ადგილზე მედიაციის პროცესში. სახელმწიფო პირველივე დღიდან არის ჩართული შრომის ინსპექციის სახით. ჩვენ შეგნებულად დავაცადეთ ორივე მხარეს, რათა გამოეჩინათ მაქსიმალური ძალისხმევა და გამოენახათ საერთო ენა, შემდგარიყო დიალოგი...

ასეთი საკითხები პირველ რიგში, უნდა წყდებოდეს დამსაქმებელსა და დასაქმებულებს შორის ორმხრივი დიალოგის რეჟიმში.

მაგრამ ვინაიდან წამოჭრილი საკითხების დიდი ნაწილი ეხება ისეთ თემებს, როგორიცაა შრომითი უსაფრთხოება, შრომის ნორმალური პირობები, კვების საკითხი, ეკოლოგიური საკითხები, რაც ნამდვილად გვადარდებს დ ჩვენთვის პრიორიტეტია, ვინაიდან ეს საკითხი დროში გაჭიანურდა, ჩვენ უშუალოდ შევხვდებით მხარეებს და ჩვენს რესურსს გამოვიყენებთ, რომ ორივე მხარის პოზიცია მაქსიმალურად დაახლოვდეს და არსებული ვითარება დროულად განიმუხტოს“, -განაცხადა ეკონომიკის მინისტრმა.