საპარლამენტო ოპოზიციაში აცხადებენ, რომ 2017 წლიდან მოყოლებული ომბუდსმენის ანგარიშში არის არაერთი საქმე, რომლიდანაც იკვეთება ქვეყანაში არსებული სისტემური პრობლემები და ეს ეხება ძირითადად გამოძიების ნაწილს და სასამართლოში არსებულ ვითარებას.

„2017 წლის სახალხო დამცველის ანგარიშიდან არის არაერთი რეკომენდაცია, რომელიც კვლავ ასახულია და ჩვენ ვხედავთ, რომ ქვეყანაში რჩება რამდენიმე მიმართულებით სისტემური პრობლემა, სადაც ხელისუფლება ვერ უზრუნველყოფს უფლებების ჯეროვან დაცვას, მათ შორის პირველ რიგში გამოვყოფდი გამოძიების ნაწილს, პროკურატურის საქმიანობას, სხვადასხვა გახმაურებულ საქმეებს, რომელიც ასახულია ანგარიშში და სასამართლოში არსებული ვითარება“ - განაცხადა ევროპული საქართველოს წევრმა გიორგი ტუღუშმა.

დღეს სახალხო დამცველი პარლამენტში ყოველწლიური მოხსენებით წარსდგა, სადაც საუბარია გამოუძიებელ საქმეებზე, მათ შორის მთავარი ნაწილი ეთმობა თემირლან მაჩალიკაშვილის გარდაცვალებას, სადაც ნათქვამია, რომ პროცესი გაუმჭვირვალედ მიმდინარეობს.