სამოქალაქო აქტივისტი და ანტისაოკუპაციო მოძრაობის წევრი დავით ქაცარავა, დავით გარეჯის სამონასტრო კომპლექსთან დაკავშირებით შექმნილ სიტუაციას ეხმაურება, ქაცარვას თქმით, ჩიჩხიტურის მონასტრამდე მისასვლელი გზა დღეს ისევ ჩაკეთილია და კომპლექსის თავზე აზერბაიჯანული სამხედრო ვერტმფრენი დაფრინავს და სიტუაციას ჰაერიდან აკონტროლებს.

„სამწუხარო რეალობა გაგვითენა დღეს, გუშინდელი სასიხარულო დღის შემდეგ. ბუნებრივია, ბედნიერები ვიყავით იმით, რომ გაიხსნა მთლიანად სამონასტრო კომპლექსი ჩიჩხიტურის ჩათვლით, რომელშიც 12 წელი ვერავინ ვერ ადიოდა, დღეს კვლავ დაკეტილი არის. ეს უკავშირდება, როგორც გვიხსნიან იმასთან დაკავშირებით, რომ ჩამოსული არის აზერბაიჯანული დელეგაცია უდაბნოს მონასტერთან და იქ უნდა გაიმართოს შეხვედრა, მაგრამ რატომ არის დაკეტილი ჩიჩხიტურის მონასტერი, სადაც, ყოველ შემთხვევაში, ჩვენ ქვემოდან ვერ დავინახეთ ვერცერთი ქართველი მესაზღვრე, ეს ცოტა არ იყოს გაურკვეველია და კითხვებს აჩენს,“ - ამბობს ქაცარავა.

ქაცარავას თქმით, ხვალ აზერბაიჯანული მხრიდან იგეგმება აქტივისტების ასვლა ჩიჩხიტურის მონასტერზე და გამორიცხული არაა მათი მხრიდან პროვოკაციების მოწყობა:

„ჩვენი მოლოდინი კი ხვალინდელ დღესთან დაკავშირებით არის ძალიან შემაშფოთებელი, ვინაიდან ჩვენ ვიცით, რომ ხვალ მინიმუმ ორი ავტობუსის შემადგენლობით ჩიჩხიტურის მხრიდან იმ გზაზე, რომელიც სპეციალურად ამისთვის გაუყვანა აზერბაიჯანულმა მხარემ და რაშიც ხელი არავის, სამწუხაროდ, არ შეუშლია, ზუსტად იქ აპირებენ ხვალ აქტივისტები ამოსვლას ჩიჩხიტურის მონასტერზე და პროვოკაციის მოწყობას,“ - განაცხადა ქაცარავამ.