საქართველოს კათოლიკოს-პატრიარქმა ილია მეორემ დიასპორის დღისადმი მიძღვნილ ყოველწლიურ ფორუმზე ემიგრანტების პრობლემებზე ისაუბრა და ხელისუფლებას მოიყწოდა რომ ენიგრაციაში მყოფ ხალხს ხელი შეუწყონ, რათა ქვეყანაში დაბრუნება გაუადვილდეთ. პატრიარქმა ქართული დიასპორის როლზე ისაუბრა და აღნიშნა, რომ უცხოეთში მყოფმა საქართველოს მოქალაქეებმა უნდა გაიაზრონ, რომ მათი საქმიანობა იმოქმედებს ქვეყნის უვიზო მიმოსვლაზე.

„გულითადად მოგესალმებით საქართველოს ეკლესიის სახელით. დღეს ჩვენს წინაშე დგას მნიშვნელოვანი საკითხი, რა მონაწილეობა უნდა მიიღონ უცხოეთში მცხოვრებმა ქართველებმა საქართველოს განვითარებაში. უნდა ითქვას, რომ მათი მოღვაწეობა ძალიან მნიშვნელოვანია. ისინი ბევრს აკეთებენ საქართველოსთვის. ჩვენ მოხარული ვართ, რომ მრავალი მეცნიერი, მრავალი ადამიანი ემსახურება საქართველოს და იმედია, რომ ეს მათი მოღვაწეობა იქნება მეტად მნიშვნელოვანი საქართველოსთვის, მაგრამ არ შემიძლია არ ვთქვა, რომ არის უარყოფითი მხარეებიც. მრავალი ქართველო ადამიანი დღეს იმყოფება ციხეში ქურდობისთვის ან სხვა უარყოფითი საქმისთვის. ჩვენ ყველაფერი უნდა გავაკეთოთ, რომ აღმოიფხვრას ეს უარყოფითი მხარეები.

ჩვენ უნდა გვახსოვდეს, რომ დიასპორის მოქმედება, საქმიანობა ბევრად იმოქმედებს სავიზო რეჟიმზე. სავიზო რეჟიმი გაიოლდება, თუ ჩვენი ქართველები კარგად მოიქცევიან. იმედი მაქვს, რომ ეს ასე იქნება.

გულითადად მივესალმები უცხოეთში მცხოვრებ ჩვენს ქართველებს. მინდა ვთქვა, რომ ძალიან დიდი მნიშვნელობა აქვს ეკლესიებს, ტაძრებს რომელიც ჩვენ გავხსენით უცხოეთში. ყოველ ეკლესიასთან არის შექმნილი საკვირაო სკოლა, სადაც ასწავლიან ქართულ ენას, ლიტერატურას, ისტორიას, სადაც ასწავლიან ქართულ ტრადიციებს. მინდა ვთხოვო ჩვენს ხელისუფლებას, რომ გავუადვილოთ ჩამოსვლა ქართველ ადამიანებს სამშობლოში."- განაცხადა პატრიარქმა.