შიმშილობის მე-9 დღე ჭიათურაში - საპროტესტო აქციამ მთელი ქალაქი მოიცვა ტექსტი

პოლიტიკა - 12:10, 25 May, 2019

872

ჭიათურაში საპროტესტო აქციამ დღეს მთელი ქალაქი მოიცვა. მოშიმშილეები და ჯორჯიან მანგანეზისთანამშრომლები კარვებიდან დროებით გამოვიდნენ და საპროტესტო მსვლელობა ქალაქის ქუჩებში გამართეს.

15 ადამიანი უკვე 9 დღეა ხელფასების გაზრდის და სამუშაო პირობების გაუმჯობესების მოთხოვნით აქციას მართავენ. რამდენიმე მათგანმა პირიც კი ამოიკერა.

„პროტესტის შეწყვეტას, რა თქმა უნდა, ჩვენ არ ვაპირებთ არანაირად, სანამ შედეგს არ დავდებ, სანამ არ მივიყვანთ ამ დაწყებულ საქმეს ბოლომდე. მაგრამ, როგორც ასეთი, არის ნიუანსები, რომელიც უნდა შეიცვალოს. ერთმანეთში აქვთ საუბრები მთავრობას და ჩვენს წარმომადგენელ კომპანიას, რომელმაც გაგვიშრო უკვე წლებია, სისხლი... შაბათ-კვირა უნდა მივცეთ დრო. მგონი, ამ შაბათ-კვირას დააფიქსირებენ ჩვენს სახალხო აზრს... ველოდებით, თუ არადა მოუწევთ თითოეულ მათგანს, დატოვონ სამსახურები,“ - განაცხადა აქციის მონაწილემ.

აქციის მონაწილეები ამბობენ, რომ სანამ შედეგი არ დადგება და მათი მოთხოვნები არ დაკმაყოფილდება, პროტესტს არ შეწყვეტენ.

„მივმართავთ კომპანიას, რომელიც ეწევა დაშინების და ზეწოლის კამპანიას, უგზავნის მესიჯებს, მუდმივად საუბრობს სამართალდამცავი ორგანოების ჩართულობაზე და ამით ცდილობს, ზეწოლა მოახდინოს მაღაროელებზე. ჩვენთვის აბსოლუტურად მიუღებელია იმ კომპანიისგან კანონის ენით ლაპარაკი, რომელიც მუდმივად არღვევს შრომით კანონმდებლობას, გარემოს დაცვით კანონმდებლობას. ასევე, მივმართავთ სახელმწიფოს, რომ უზრუნველყოს ამ ადამიანების შრომითი უფლებების დაცვა,“ - განაცხადა აქციის მონაწილემ.