საქართველოს ფინანსთა სამინისტროს საგამოძიებო სამსახურის დელეგაცია სამუშაო ვიზიტით ლიეტუვას რესპუბლიკაში საგამოძიებო სამსახურის უფროსის სოსო რამიშვილის ხელმძღვანელობით იმყოფება. საგამოძიებო სამსახურის დელეგაციის წევრები, ლიეტუვას რესპუბლიკის შინაგან საქმეთა სამინისტროს მთავარ მრჩეველს, რუსტამას ლიუბაჟევასს, ფინანსური დანაშაულის საგამოძიებო სამსახურის უფროსს ენტონი მიკულსკისს და სხვა ხელმძღვანელ პირებს შეხვდნენ. შეხვედრას ესწრებოდა საქართველოს საგანგებო და სრულუფლებიანი ელჩი ლიეტუვას რესპუბლიკაში, ლევან ღვაჩლიანი.

შეხვედრის ფარგლებში, კოლეგა უწყებებს შორის საფინანსო - ეკონომიკური დანაშაულის წინააღმდეგ ბრძოლის სფეროში ურთიერთგაგების მემორანდუმი გაფორმდა, რომელსაც ხელი მოაწერეს საგამოძიებო სამსახურის უფროსმა, სოსო რამიშვილმა და ლიეტუვას რესპუბლიკის შინაგან საქმეთა სამინისტროს ფინანსური დანაშაულის საგამოძიებო სამსახურის უფროსმა, ენტონი მიკულსკისმა.

ურთიერთგაგების მემორანდუმი საქართველოსა და ლიეტუვას სამართალდამცავ უწყებებს შორის, საფინანსო - ეკონომიკურ სფეროში ჩადენილი დანაშაულის გამოვლენის, აღკვეთის და გამოძიების მიმართულებით ორმხრივ თანამშრომლობას ითვალისწინებს. საგამოძიებო სამსახურის უფროსმა, სოსო რამიშვილმა აღნიშნა - “ფინანსთა სამინისტროს საგამოძიებო სამსახურსა და ლიეტუვას რესპუბლიკის კოლეგა უწყებას შორის გაფორმდა ურთიერთგაგების მემორანდუმი. მოხარული ვარ, რომ დოკუმენტს ხელი მოეწერა მხარეების მიერ. ჩვენთვის ძალიან მნიშვნელოვანია ევროპელი კოლეგების გამოცდილების გაზიარება და ვიმედოვნებ, რომ ჩვენი ურთიერთობა მომავალში გაგრძელდება და მეტი შედეგის მომტანი იქნება ორივე ქვეყნის უწყებისთვის”.

ლიეტუვას რესპუბლიკის შინაგან საქმეთა სამინისტროს ფინანსური დანაშაულის საგამოძიებო სამსახურის ხელმძღვანელმა ენტონი მიკულსკისმა განაცხადა: “მოხარული ვარ, რომ ხელი მოეწერა ურთიერთგაგების მემორანდუმს ორ სამართალდამცავ უწყებას შორის, საქართველოს ფინანსთა სამინისტროს საგამოძიებო სამსახურსა და ლიეტუვას რესპუბლიკის შინაგან საქმეთა სამინისტროს ფინანსური დანაშაულის საგამოძიებო სამსახურს შორის. იმედს ვიტოვებთ, რომ აღნიშნული მემორანდუმის ფარგლებში ჩვენი თანამშრომლობა კიდევ უფრო გაღრმავდება, გაუმჯობესდება ინფორმაციის გაცვლა ორ უწყებას შორის, განხორციელდება ერთობლივი პროექტები, რომლებიც კონკრეტულ დადებით შედეგებს მოგვიტანს”

ვიზიტის ფარგლებში გამართულ შეხვედრებზე საუბარი შეეხო საფინანსო - ეკონომიკურ სფეროში ჩადენილი დანაშაულის გამოძიების მეთოდოლოგიას, თაღლითობის წინააღმდეგ ბრძოლის ევროპულ ოფისთან (OLAF) ლიეტუველი კოლეგების თანამშრომლობას, ხაზი გაესვა გამოძიების პროცესში სხვადასხვა საინფორმაციო ბაზების გამოყენების მნიშვნელობას, საქართველოს და ლიეტუვას კოლეგა უწყებების საქმიანობის სხვა ძირითად ასპექტებს, სამომავლო თანამშრომლობის გაღრმავების მიზნით, ორი ქვეყნის სამართალდამცავ უწყებას შორის კონკრეტული მიმართულებები დაიგეგმა.

ვიზიტის ფარგლებში საგამოძიებო სამსახურის დელეგაცია შეხვედრებს გამართავს ასევე, ლიეტუვას რესპუბლიკის სპეციალური საგამოძიებო სამსახურისა და საბაჟო დეპარტამენტის ხელმძღვანელ პირებთან.