"რუსთავი 2"-ის 9%-იანი წილის მფლობელის მოთხოვნით, პარტნიორთა კრება იმართება

პოლიტიკა - 15:01, 25 May, 2019

1132

„რუსთავი 2“-ის 9%-იანი წილის მფლობელის ნინო ნიჟარაძის მოთხოვნით პარტნიორთა კრება გაიმართება. როგორც ნიჟარაძის ადვოკატმა გიორგი ყავლაშვილმა დღეს გამართულ ბრიფინგზე განაცხადა ნიჟარაძე რამდენიმე მოთხოვნას აყენებს. ადვოკატის თქმით, დავის მოგვარებისთვის საჭირო გზების მონახვა აუცილებელია.

ყავლაშვილის განცხადებით, თუ მოხდება არბიტრაჟზე შეთანხმება, მაშინ სასამართლოდან სარჩელს უკან გაიწვევენ. ნიჟარაძის მხარეს აინტერესებს "რუსთავი 2"-ის გენერალური დირექტორის და პარტნიორების პოზიცია მათთვის საინტერესო ფინანსურ საკითხებთან დაკავშირებით.

„შევთავაზეთ არბიტრაჟის მეშვეობით საკითხის გადაჭრა, არბიტრაჟში დავის გადატანა,. ეს გაჟღერდა რუსთავი 2-ის დირექტორის მხრიდან, ჩვენ ვეხმიანებით ამ განცხადებას და მზად ვართ, რომ მივაღწიოთ ამ საკითხთან მიმართებაში შეთანხმებას და ასევე, ვთავაზობთ კიდევ უფრო მარტივ გზას და ეს მარტივი გზა გახლავთ ფინანსური და იურიდიული დოკუმენტების გადაცემა მსოფლიოში წამყვანი 4 აუდიტორული კომპანიისთვის, სხვადასხვა შესაბამისი საკითხებით და წინასწარ ვაცხადებთ, რომ მხარეთა შეთანხმებით, თუკი იქნება არჩეული ასეთი აუდიტორული კომპანია, ჩვენ ყველანაირად ვენდობით იმ შედეგებს, რომელსაც ეს აუდიტორული კომპანია დადებს.“ - განაცხადა გიორგი ყავლაშვილმა.

„რუსთავი 2“-ის 9-პროცენტიანი წილის მფლობელი პარტნიორთა კრებაზე მედიის დასწრებას ითხოვს.

დღის წესრიგში გათვალისწინებულია სამი საკითხის განხილვა - ნინო ნიჟარაძის მხარე ითხოვს, რომ წარდგენილ სარჩელთან დაკავშირებით დავის ალტერნატიული გზებით გადაჭრის საშუალებების მოძიება და შეთანხება მოხდეს. მეორე საკითხი გულისხმობს სამაუწყებლო კომპანიის გენერალური დირექტორის, ნიკა გვარამიას, პოზიციის ანგარიშის მოსმენას სარჩელში დაყენებულ საკითხებზე.

მესამე საკითხს რუსთავი2-ის მენეჯმენტი აყენებს. ის ეხება პარტნიორების მიერ ინფორმაციის წარმოდგენას რუსთავი2-ის მიმართ სახელმწიფოს მხრიდან წარმოებული დევნისა და ზეწოლის წინააღმდეგ კომპანიის პარტნიორების მიერ განხორციელებული და განსახორციელებელი ღონისძიებების შესახებ.

„დღის წესრიგში არის ორი საკითხი, რომელიც ნიჟარაძის ინიციატივით არის. ეს შეეხება სარჩელში დასმულ საკითხებთან დაკავშირებით ინფორმაციის მოსმენას, აგრეთვე შესაძლო აუდიტის ან არბიტრაჟის მიერ დავის ალტერნატიული საშუალებებით გადაწყვეტის შესახებ საუბარს. აგრეთვე, დირექტორის მხრიდან ინფორმაციის მოსმენა. აგრეთვე, დამატებული იქნა მესამე საკითხი, რაც გულისხმობს პარტნიორთა მხრიდან რუსთავი2-ის წინააღმდეგ მიმართული ბრძოლის ფარგლებში გადადგმული და მომავალში გადასადგმელი ნაბიჯების შესახებ ინფორმაციის მოსმენას,“ - განაცხადა რუსთავი2-ის იურისტმა, დიმიტრი საძაგლიშვილმა.

რუსთავი2-ის იურისტების განცხადებით, ნინო ნიჟარაძის სასამართლოში სარჩელის შეტანამდე მის მიერ პარტნიორთა კრება არ მოწვეულა. მათი თქმით, სამაუწყებლო კომპანიის 9%-იანი წილის მფლობელი თუ რაიმეთი უკმაყოფილო იყო, მას დავის დაწყებამდე შეეძლო, რომ პარტნიორთა კრება მოეწვია, თუმცა, ნინო ნიჟარაძემ ეს ნაბიჯი მხოლოდ სასამართლოში სარჩელის შეტანის შემდეგ გადადგა.

„ახლა პარტნიორთა კრების ჩანიშვნა და ამ საკითხების განხილვა გულისხმობს იმას, რომ მას თავისუფლად შეეძლო, ამ საკითხებზე თუ რამით უკმაყოფილო იყო, მოეწვია პარტნიორთა კრება და მაშინვე არ გაქცეულიყო სასამართლოში. ამიტომ ახლა პარტნიორთა კრების ფარგლებში უნდა ვიმსჯელოთ იმ საკითხებზე, რა სასარჩელო მოთხოვნებიც აქვს მას მოთხოვნილი სასამართლოში. პარტნიორთა კრება მას არ მოუწვევია, თუ მან არ მიიღო პასუხი და ამით უკმაყოფილო იყო, მას შეეძლო, რომ მოეწვია პარტნიორთა კრება, რომელიც არ გაუკეთებია და მაშინვე წავიდა სასამართლოში,“ - განაცხადა რუსთავი2-ის იურისტმა, თამთა მურადაშვილმა.