"შეიკრა სანათესაო, დაჯგუფება და წავიდა ჩემზე მუქარები ეს რა გააკეთეო" - ლგბტ თემის მხარდამჭერი განცხადების გამო, ივა ყურშუბაძე ნათესავებს მუქარაში ადანაშაულებს

პოლიტიკა - 20:23, 23 May, 2019

1155

ბათუმის მკვიდრი ივა ყურშუბაძე ნათესავებს მუქარაში ადანაშაულებს. როგორც ყურშუბაძე აცხადებს მათესავები რამდენიმე დღის წინ გაკეთებული განცხადების გამო ემუქრებიან.

ივა ყურშუბაძის თქმით, მას შემდეგ, რაც მან ლგბტ თემის მხარდამჭერი განცხადება გააკეთა, მისი ახლო ნათესავები ბებიასთან მივიდნენ ერთ-ერთ სოფელში და დაემუქრნენ სიცოცხლის მოსპობით.

„დამემუქრნენ სიცოცხლის მოსპობით, განადგურებით, რომ მე შევარცხვინე გვარი ჩემს მიერ გაკეთებული ინტერვიუთი და ამით შეიკრა სანათესაო, დაჯგუფება ასე ვთქვათ და წავიდა ჩემზე მუქარების შემცველი შეტყობინებები, შემოთვლები, რომ სოფელში არ ამოხვიდე, გაგანადგურებთ, მოგკლავთ, ეს რა გააკეთე, გვარის შეურაცხმყოფელი საქციელი იყო ეს, შენ არ გეპატიება და ამას სისხლით ჩამოვრეცხავთ ამ დიდ სირცხვილს. ბებიაჩემთან იყვნენ მისულები ეს ნათესავები. მე ვერ ვახერხებ სოფელში ასვლას, იმიტომ რომ ძალიან დიდი შანსია იმისა, რომ მე რაიმეს დამიშავებენ“ - ამბობს ივა ყურშუბაძე.

საქმე 151- ე მუხლით მუქარის ფაქტზე აღიძრა. ივა ყურშუბაძის ინტერესებს საია იცავს. უფლებადამცველის თქმით, მოხდა რამდენიმე პირის იდენტიფიცირებაც.