მედიაში გავრცელებული ცრუ ინფორმაცია კომპანია AiCar-ის საქმიანი რეპუტაციის შელახვას ემსახურება

პოლიტიკა - 14:51, 23 May, 2019

743

„კომპანია AiCar 2018 წლიდან საქმიანობს. კომპანიის სადამფუძნებლო სტრუქტურა და რეგისტრაციის მონაცემები არის ღია, გამჭვირვალე ინფორმაცია, რომელიც განთავსებულია საჯარო რეესტრის ვებგვერდზე. ამდენად, სრული სიცრუეა „რუსთავი 2"-ის მიერ გავრცელებული ინფორმაცია, თითქოს AiCar რუსული კომპანიაა. რაც შეეხება ჩვენს საქმიანობას: AiCar მომხმარებლებს სთავაზობს ელექტრომობილებით მომსახურებას, სპეციალური მობილური აპლიკაციის მეშვეობით.

AiCar-ის პარტნიორები და მომწოდებლები არიან ამ სფეროში წარმატებული კომპანიები სხვადასხვა ქვეყნებიდან, მათ შორისაა გერმანია, უკრაინა და იაპონია. ამჟამად აპლიკაცია მუშაობს სატესტო რეჟიმში, რაც შეეხება აპლიკაციაში რეგისტრაციისას შეყვანილი პირადი მონაცემების დაცულობას - სრული პასუხისმგებლობით გვინდა განვაცხადოთ, რომ ჩვენი კომპანიის სერვერები, სადაც ხდება მომხმარებლების მონაცემთა ბაზების შენახვა, მდებარეობს საქართველოს ტერიტორიაზე. სერვერები იმყოფება 24-საათიანი მონიტორინგის ქვეშ და ხელმისაწვდომი არ არის არავითარი მესამე მხარისთვის, მით უფრო - რუსეთისთვის, როგორც ამას ზემოხსენებული მედიასაშუალება აცხადებს.

კომპანია AiCar მოუწოდებს ყველა მედიასაშუალებას, კომპანიის საქმიანობის შესახებ ნებისმიერი ინფორმაცია გავრცელებამდე გადაამოწმონ, რათა არ მოხდეს საზოგადოების შეცდომაში შეყვანა“ - ნათქვამია განცხადებაში.

ცნობისათვის, კომპანია AiCar-ის საქმიანობასთან დაკავშირებით ინფორმაცია სოციალურ ქსელშიც გავრცელდა. ფეისბუქმომხმარებელი უჩა აბაშიძე წერდა, რომ აპლიკაცია პირად მონაცემების და საბანკო ანგარიშის შეყვანას ითხოვს, მსგავსი მონაცემების ოკუპანტი ქვეყნის სერვერებზე განთავსება კი საფრთხის შემცველია. აღნიშნული სერვისის და აპლიკაციის რეკლამირებაში აქტიურად არის ჩართული დედაქალაქის მერი კახა კალაძე და თავის ერთ-ერთ მიღწევად მიიჩნევს. დედაქალაქის მერმა მედიასთან კომენტირებისას განაცხადა, რომ ხელისუფლება ყველა კომპანიას მიესალმება, რომელიც საქართველოში ინვესტიციებს განახორციელებს.