საუბარია, პეტრე დევრიშაძეზე, რომელთან დაკავშირებული სკანდალი ერთი წლის წინ გასკდა, როცა გაირკვა, რომ ჯაშუშობისთვის გასამართლებული დევრიშაძე ქართულ ჯარს ამარაგებდა.

ჟურნალისტმა გამომძიებლებმა მაშინ გამოიძიეს, რომ დევრიშაძის კომპანიამ ყველაზე დიდი შეკვეთები მას შემდეგ მიიღო, რაც თავდაცვის მინისტრი ლევან იზორია გახდა.

დიდი სკანდალის შემდეგ, თავადაცვის მინისტრმა და პრემიერმა საპარლამენტო ტრიბუნებიდან აღიარეს, რომ უხერხულობას გრძნობდნენ და კანონის ხარვეზების გამოსწორებაზე ზრუნვა დაიწყეს.

„მთელი ამბავი ელისო ჯარიაშვილისგან“ კი ოფიციალურ დოკუმენტებზე დაყრდნობით, მომზადებულ სიუჟეტში აღნიშნავს, რომ საკანონმდებლო ცვლილებები მომზადებულიც კი არ არის.

თემით დაინტერესებული ჟურნალისტები სახელმწიფო შესყიდვების სააგენტომ თავდაცვისა და უშიშროების კომიტეტში გადაამისამართა, ამ უკანასკნელმა კი საკითხის გარკვევა მედიას თავდაცვის სამინისტრში ურჩია.

ამასობაში კი გაირკვა, რომ დევრიშაძის კომოპანიები სახელმწიფო ტენდერებში ისევ მონაწილეობს და იმარჯვებს კიდეც.

თბილისის მერიას დაქვემდებარებულმა შპს „თბილსერვის ჯგუფმა“ გასული წლის 29 ნოემბერს, „გლობალ თრეიდ გრუპს“ ხელშეკრულება გაუფორმა. ამავე კომპანიასთან გააფორმა ხელშეკრულება ლევან სამხარაულის სახელობის სასამართლო ექსპერტიზის ეროვნულმა ბიურომაც. დოკუმენტი 2018 წლის 11 ოქტომბრით თარიღდება.

„მთელი ამბავი ელისო ჯარიაშვილისგან“ მომზადებული სიუჟეტიდან ირკვევა, რომ რუსეთის სასარგებლოდ ჯაშუშობის ბრალდებით დაკავებული პირის კომპანია კვლავ იღებს მონაწილეობას და იმარჯვებს სუს-ის, თავდაცვის სამინისტროს ტენდერებში. აღსანიშნავია, რომ ძალოვანი უწყებების შემთხვევაში დევრიშაძესთან საბოლოო ხელშეკრულება არ ფორმდება, თუმცა ჟურნალისტური გამოძიების ავტორები მიანიშნებენ, რომ სახელმწიფოს საკითხის მიმართ ერთიანი მიდგომა არ გააჩნია.

აღსანიშნავია, რომ 2012 წლიდან დღემდე სხვადასხვა სახელმწიფო სტრუქტურამ რუსულ კომპანიებთან 213 ხელშეკრულება გააფორმა. აქიდან 43 პირდაპირი შერჩევის გზით - კონკურსის გარეშე.

საბოლოო ჯამში, რუსული წარმომავლობის კომპანიებს „ქართული ოცნების“ მმართველობის პერიოდში 159 მილიონი ლარის ტენდერები აქვთ მოგებული.