სახელმწიფოს არ შეუძლია ინვესტორის კომერციული რისკების დაზღვევა - ცქიტიშვილი ანაკლიის პორტის დაფინანსებაზე

პოლიტიკა - 14:42, 21 May, 2019

831

დღეს ანაკლიის პორტის დაფინანსებასთან დაკავშირებით ფინანსთა სამინისტროში შეხვედრა გაიმართა. ვიცე-პრემიერმა, მაია ცქიტიშვილმა არაერთხელ გაიმეორა, რომ სახელმწიფო საკუთარ თავზე ანაკლიის ღრმაწყლოვანი პორტის კომერციული რისკების დაზღვევას არ აიღებს. მინისტრის თქმით, ინვესტორმა და ბანკებმა უნდა იპოვონ შესაბამისი მექანიზმები, რათა რისკების დაზღვევა სახელმწიფოს ჩართვის გარეშე მოხდეს. ცქიტიშვილის თქმით, მოლაპარაკება გაგრძელდება იქამდე, სანამ ეს მექანიზმები არ იქნება მოპოვებული.

„მთავარია ინვესტორის კომერციული რისკების დაზღვევა, რაზეც არაერთხელ გვითქვამს, რომ ყველაზე რთული პოზიცია სახელმწიფოს მხრიდან იქნება ამ საკითხზე. სახელმწიფოს არ შეუძლია ინვესტორის კომერციული რისკების დაზღვევა. ეს არის პოზიცია, რაზეც ვსაუბრობთ კონსორციუმთან და ბანკებთან, თუ რა დამატებითი ინსტრუმენტების გამოყენება არის შესაძლებელი კომერციული რისკების დასაზღვევად ისე, რომ სახელმწიფოს არ მოუწიოს ამ რისკების დაზღვევა. ვსაუბრობთ იმაზე, რა საერთაშორისო ორგანიზაციები, საერთაშორისო ინსტრუმენტები ან უშუალოდ ბანკების ინსტრუმენტები არსებობს, რომ დაეხმაროს ინვესტორს ამ რისკების დაზღვევაში. ყველანი ვართ პოზიტიურად განწყობილი”, – განაცხადა ცქიტიშვილმა.

ინფრასტრუქტურის მინისტრი ამბობს, რომ ანაკლიის განვითარების კონსორციუმისთვის დაფინანსების მოსაზიდად გათვალისწინებული ვადა, რომელიც ივნისში იწურება, სავარაუდოდ, გახანგრძლივდება.