თბილისის მერი, კახა კალაძე საფეხბურთო სკანდალს ეხმაურება. როგორც თბილისის მერი ამბობს, მისთვის, როგორც სპორტსმენისთვის, კატეგორიულად მიუღებელია მსგავსი ქმედებები და ფეხბურთელებმა, რომლებიც გარიგებაში იღებენ მოანწილეობას, პასუხი უნდა აგონ საკუთარ დანაშაულზე.

„ჩემთვის, როგორც ყოფილი სპორტსმენისთვის, კატეგორიულად მიუღებელია ასეთი ქმედებები და შესაბამისად, პასუხი უნდა აგონ თავიანთ დანაშაულზე. თუ ხარ სპორტსმენი, მოღვაწეობ სპორტში, ეს მიდგომები და დამოკიდებულება ეს არ არის სპორტი, ეს უკვე სხვა რაღაცაა,“ - განაცხადა კახა კალაძემ.

სახელმწიფო უსაფრთხოების სამსახურის ანტიკორუფციულმა სააგენტომ საფეხბურთო მატჩების ჩაწყობის ფაქტზე 8 მოქმედი და 3 ყოფილი ფეხბურთელი დააკავა. გამოძიება პროფესიული სპორტული შეჯიბრების მოსყიდვის ფაქტზე მიმდინარეობს (საქართველოს სსკ-ის 203-ე მუხლის მე-3 და მე-4 ნაწილებით, რაც სასჯელის სახით 4-დან 6 წლამდე თავისუფლების აღკვეთას ითვალისწინებს).

სუს-ის ინფორმაციით, მატჩების წინასწარ შეთანხმებული ანგარიშით დასრულებისათვის ორგანიზებული დანაშაულებრივი ჯგუფის წევრებმა და ფეხბურთელებმა ჯამში მიიღეს განსაკუთრებით დიდი ოდენობით თანხა - 93 500 ლარი.