"პირველივე ტურში დამაჯერებლად გავიმარჯვებთ ზუგდიდში, ისინი ვერცერთი ხმის გაყალბებას ვერ შეძლებენ"- გიორგი ვაშაძე

პოლიტიკა - 19:28, 19 May, 2019

834

გაერთიანებული ოპოზიციის ერთ-ერთმა ლიდერმა გიორგი ვაშაძემ მხარდამჭერებს არჩევნების დასრულებამდე დარჩენილ დროში საარჩევნო უბნებზე მისვლისა და არჩევანის დაფიქსირებისკენ მოუწოდა. ვაშაძის თქმიტ, გაერთიანებულ ოპოზიციას ძალიან კარგი პოზიციები აქვს და სავარაუდოა, რომ სანდრა რულოვსი ზუგდიდში გამარჯვებას პირველივე ტურში მოიპოვებს:

„ძალიან კარგი პოზიციები გვაქვს, მაღალი ალბათობით ჩვენ პირველივე ტურში დამაჯერებლად გავიმარჯვებთ ზუგდიდში, ასევე ძალიან კარგი პოზიციები გვაქვს ზესტაფონში, მარნეულში და სხვა რაიონებში. ერთი საათი დარჩა არჩევნების დასრულებამდე და ძალიან მნიშვნელოვანია, რომ არ დავიზაროთ და მივიდეთ არჩევნებზე, იმიტომ რომ თითოეული თქვემგანის ხმა ძალიან მნიშვნელოვანია. ჩვენ ყველაფერი გავაკეთეთ დღის მანძილზე რომ ყველა ზეწოლის მექანიზმი, სამართალდამცავი ორგანოები, ასობით მანქანა, რომელიც ჩამოიყვანეს, ფაქტობრივად გადავკეტეთ მათი მუშაობის პროცესი და მაქსიმალურად შევქმენით გარემო, როცა თითოეულ ადამიანს აქვს ნების გამოხატვის შესაძლებლობა. რაც არ უნდა გითხრან რომ ვიღაცა გიღებთ და გაკონტროლებთ, ვერავინ ვერ გააკონტროლებს თქვენს ხმას, რომელიც მიდის საარჩევნო ურნაში. ჩვენი მონაცემებით ჩვენ ძალიან მყარი პოზიციები გვაქვს და ალბათ დღეს დასრულდება არჩევნები ზუგდიდში სანდრა რულოვსის გამარჯვებით, მაგრამ მნიშვნელოვანია, რომ თქვენ მოხვიდეთ.

მინდა მადლობა ვუთხრა საარჩევნო კომისიის წევრებს და დამკვირვებლებს, თქვენ გმირები ხართ, რასაც თქვენ გაუძელით, მაგრამ ერთი დიდი გმირობა გაქვთ კიდევ ჩასადენი, იმისთვსი, რომ ყველა ხმა დავიცვათ საარჩევნო უბნებზე, ახლა იწყება ძალიან მნიშვნელოვანი პროცესი, ჩვენი ინფორმაციით ქართული ოცნება შეეცდება ძალიან ბევრ რამეს ხმის დათვლის პროცესში, მაგრამ თუ ერთად ვიქნებით, მაგრად ვიქნებით და ბოლომდე ვიბრძოლებთ, ისინი ვერცერთი ხმის გაყალბებას ვერ შეძლებენ. მთავარია არ მოვდუნდეთ, გამარჯვებამდე ძალიან ცოტაა დარჩენილი და ძალიან გთხოვთ რომ ყველა ვიყოთ მობილიზებულები.“- განაცხადა გიორგი ვაშაძემ, მან მადლობა გადაუხადა ყველა აქტივისტს, დამკვირვებელსა და ჟურნალისტებს, რომლებიც არჩევნებს გაყალბებისგან იცავდნენ.

ვაშაძემ ოპოზიციის წარმომადგენლებს საარჩევნო კომისიებში და დამკვირვებლებს მოუწოდა რომ განსაკუთრებული ყურადღება გამოიჩინონ ბიულეტენების დათვლის დროს, რათა ყველა ხმა იქნეს დაცული.