"სპეცოპერაცია ჩაატარეს სოფლის დასანახად და დასაშინებლად, ვითომ შვარცენეგერი იყო და ვერ გააკავებდნენი"- ზესტაფონში დამკვირვებელი დააკავეს

პოლიტიკა - 14:00, 19 May, 2019

940

ზესტაფონში სოფელ პირველი სვირის 26-ე უბანზე "თავისუფალი საქართველოს“ დამკვირვებელი დააკავეს. მომხდარს მერობის კანდიდატი, გოგი წულაია მიზანმიმართულ პროვოკაციად აფასებს, რადგან მისი თქმით, პარტიის წევრი სპარტაკ კაპანაძე იმ დროს დააკავეს, როდესაც სიაში აღმოჩენილი „მკვდარი სულის“ გამო უკმაყოფილება დააფიქსირა.
როგორც 26-ე უბნის კომისიის თავმჯდომარე იზა ღიბრაძე აცხადებს, მან სპარტაკ კაპანაძეს გოგი წულაიას მხარდამჭერი მაისურის გამო მისცა შენიშვნა და კანონდარღვევაზე მიუთითა. ღიბრაძის თქმით, შენიშვნას ხმაური მოყვა და კომისიის თავმჯდომარემ პოლიცია გამოიძახა.

„მაისური ეცვა ჩემი წარწერით და ვაღიარებ, რომ არღვევდა კანონს, მაგრამ იმ ფონზე, რასაც თავად ჩადიან, ეს საბავშვო თამაშია. კონფლიქტი დაიწყო მას შემდეგ, რაც აღმოაჩინა „მკვდარი სულები“ სიაში, მიუთითა თავმჯდომარეს, აქ დაიწყო კონფლიქტი, გამოიძახეს პატრული, ვითომ შვარცენეგერი იყო და ვერ გააკავებდნენ. სპეცოპერაცია ჩაატარეს სოფლის დასანახად და დასაშინებლად. კანონის დარღვევა ხდება ამ წუთას, როდესაც ზესტაფონში ტარდება არჩევნები და მოსამართლეები მობილიზებული უნდა იყვნენ, რომ სწრაფად გადაწყდეს საკითხი, მეუბნებიან, რომ ერთ საათში ჩანიშნავენ პროცესს“,- განაცხადა გოგი წულაიამ.

სპარტაკ კაპანაძე ადმინისტრაციული წესით არის დაკავებული. ის პოლიციაში სამართლდამცავებისთვის დაუმორჩილებლობის გამოა გადაყვანილი.