ქალაქ ზუგდიდში, ცოტნე დადიანის ქუჩაზე მდებარე მეცხრე საარჩევნო უბანზე „ქართული ოცნების“ კანდიდატის სასარგებლოდ ხმის მიცემის სანაცვლოდ ფულის გადაცემის ფაქტი დაფიქსირდა. შესაბამის ფაქტის ამსახველი ვიდეომასალა გაერთიანებული ოპოზიციის ერთ-ერთმა ლიდერმა, ზალიკო უდუმაშვილმა გაასაჯაროვა.

ზალიკო უდუმაშვილი ყვება, რომ ზუგდიდში პირი, რომელიც საარჩევნო უბნიდან ხმის მიცესმის შემდეგ გამოდის, საარჩევნო უბნის ტერიტორიაზე მდგარ ავტომობილში ჯდება და მას გარკვეულ თანხას აძლევენ.

„ეს შავი მანქანა, დილის 06:00 საათიდან იდგა უბანთან. თქვენ ხედავთ მანქანაში მუდმივად ჯდებიან ადამიანები და გადმოდიან. უბნიდან გამოსული ადამიანი, როდესაც დააფიქსირებს, რომ მივიდა და მისცა „ქართული ოცნების“ კანდიდატს ხმა, შემდეგ ჯდება მანქანაში, მას აძლევენ ფულს და გადმოდის. ფულის დარიგების კადრებიც არსებობს უშუალოდ,“ - აცხადებს ზალიკო უდუმაშვილმა.

მისივე თქმით, შემთხვევის ადგილიდან სამ მეტრში სამართალდამცველებიც იმყოფებიან, თუმცა მომხდარ ფაქტებზე რეაგირება არ აქვთ.

„ზუსტად სამ მეტრში 10 პოლიციელი დგას, რომლებიც დგანან უბრალოდ და უყურებენ ამ ყველაფერს. მიუხედავად იმისა, რომ ჩვენმა წარმომადგენლებმა ხმაური ატეხეს, როგორც მე ვიცი, ჩვენმა წარმომადგენლებმა დარეკეს კიდეც 112-ში რომ დახმარებოდნენ, მაგრამ არაფერი. საოლქო ადმინისტრაციას საერთოდ ნოლი რეაგირება ამ ყველაფერზე, ასე მიმდინარეობს ქალაქში და სოფლებში ფულის დარიგება,“ - განაცხადა ზალიკო უდუმაშვილმა.

გაერთიანებული ოპოზიციის ერთ-ერთი ლიდერი, კიდევ ერთი დარღვევის შესახებ საუბრობს, რომელიც ამჯერად სოფელ რუხის 100-ე უბანზე დაფიქსირდა. ვიდეო მასალაში, რომელიც ზალიკო უდუმაშვილმა წარმოადგინა, ჩანს, როგორ არიგებენ ფულს. ზალიკო უდუმაშვილის თქმით, ზუგდიდში პროცესები საპრეზიდენტო არჩევნების მსგავსი სცენარით ვითარდება, თუმცა ოპოზიცია საკმაოდ მობილიზებულია.

„მინდა აღვნიშნო, რომ დღეს ძალიან განსხვავებული სიტუაციაა, ვიდრე 6 თვის წინ იყო. ზუგდიდში სწორედ ამიტომ გამოვაცხადეთ ჩვენ ძალიან დიდი მობილიზაცია ჩვენი მხარდამჭერების და აქტივისტების და დამკვირვებლების, რომ სწორედ ასეთი ფაქტები აღკვეთოთ,“ - განაცხადა ზალიკო უდუმაშვილმა.