"ვურჩევდით არჩილ თალაკვაძეს თავად გაარკვიოს რომელი უწყება ატყუებს მასაც და ამომრჩეველსაც" - გაერთიანებული ოპოზიციის პასუხი "ქართულ ოცნებას"

პოლიტიკა - 21:29, 18 May, 2019

653

საპარლამენტო უმრავლესობის ლიდერის, არჩილ თალაკვაძის განცხადებას, ამომრჩეველთა ერთიანი სიებით მანიპულაციის შესაძლო ფაქტებზე, გაერთიანებული ოპოზიციის ზუგდიდის შტაბში სიცრუეს უწოდებენ.ოპოზიციაში აცხადებენ, რომ თალაკვაძემ, დოკუმენტურად და ოფიციალური სტატისტიკით დადასტურებული ციფრების გახმოვანების ნაცვლად იცრუა, რათა დაემალა ან გაენეიტრალებინა ზუგდიდის ამომრჩეველთა სიებში არაზუგდიდელი პირების გადმოწერის რეალური ფაქტები.

"2019 წლის 18 მაისს არჩილ თალაკვაძემ გაახმოვანა მორიგი სუცრუე, რაც შეეხებოდა ამომრჩეველთა ერთიანი სიებით მანიპულაციის შესაძლო ფაქტებს და დოკუმენტურად და ოფიციალური სტატისტიკით დადასტურებული ციფრების გახმოვანების ნაცვლად იცრუა, რათა დაემალა ან გაენეიტრალებინა ზუგდიდის ამომრჩეველთა სიებში არაზუგდიდელი პირების გადმოწერის რეალური ფაქტები მან აღნიშნა, რომ „არის რიცხვები და ოფიციალური მონაცემები, პირველი მარტიდან მაისის ჩათვლით სულ 102 სარეგისტრაციო ოპერაცია არის სამოქალაქო რეესტრში განხორციელებული, რაც წინა პერიოდებს რომ შეადაროთ არის ზუგდიდის მუნიციპალიტეტში ჩვეულებრივი მიგრაციის მაჩვენებელი. შესაბამისად 102 ადამიანი არ შეიძლება ჩაითვალოს რაიმე მანიპულაციად და პროცესებში ხელოვნურ ჩარევად.” რეალურად იუსტიციის სამინისტროს მიერ საქართველოს ცენტრალური საარჩევნო კომისიისათვის გადაცემული სიებით თუ ვიმსჯელებთ, დავინახავთ რომ 2018 წლის ნოემბრიდან, ანუ საპრეზიდენტო არჩევნების მეორე ტურის შემდგომი პერიოდიდან 2019 წლის 3 მაისამდე, ზუგდიდის მუნიციპალიტეტს დაემატა 2805 ამომრჩეველი, აქედან სრულწლოვანი ასაკი შეუსრულდა 2019 წლისათვის 663 ამომრჩეველს, ხოლო დანარჩენი 2142 ამომრჩეველი არის დამატებული. ვურჩევდით არჩილ თალაკვაძეს თავად გაარკვიოს რომელი უწყება ატყუებს მასაც და ამომრჩეველსაც _ იუსტიციის სამინისტრო, სუსი თუ ცენტრალური საარჩევნო კომისია, ხოლო თავად ნუ ავრცელებს სიცრუეს ამომრჩევლის განწყობაზე და ნებაზე ზემოქმედების მიზნით. შესაბამისად ეს 2142 ამომრჩეველი არის სწორედ იმ სქემის ნაწილი, რითაც ქართული ოცნება ცდილობს ზუგდიდელებს მოპაროს არჩევანი. ჩვენთვის ცნობილია ამ ამორჩეველთა სახელობითი სია უბნების მიხედვით, შესაბამისად ჩვენ არავის მივცემთ უფლებას მსგავსი მანიპულაციების გამოყენებით გააყალბოს არჩევანი, უგულებელყოს ამომრჩევლის ნება და მიითვისოს ზუგდიდელების ხმები" - ნათქვამია გაერთიანებული ოპოზიციის განცხადებაში.