"ოცნება დაკავებულია პროვოკაციული განცხადებებით და ყალბი კვლევებით"- ბოკუჩავა თალაკვაძეს პასუხობს

პოლიტიკა - 15:23, 18 May, 2019

843

არჩილ თალაკვაძის განცხადებას იმასთან დაკავშირებით, რომ კვლევებით ზუგდიდში მმართველი გუნდის კანდიდატი ლიდერობს და ამის გამო ოპოზიცია აქტივისტების მობილიზებას და პროვოკაციებს გეგმავს, გაერთიანებული ოპოზიციის წევრმა თინა ბოკუჩავამ უპასუხა. ბოკუჩავას თქმით, ზუგდიდში გაერთიანებული ოპოზიციის კანდიდატის გამარჯვება გარდაუვალია და ხელისუფლება მსგავსი განცხადებებით შედეგების გასაყალბებლად ნიადაგს ამზადებს, თუმცა როგორც ოპოზიციონერი დეპუტატი აცხადებს, ამის საშუალებას ხელისუფლებას არ მისცემენ:

„უმჯობესი იქნებოდა არჩილ თალაკვაძე და ქართული ოცნება დაინტერესებულიყო იმით, რატომ ვხედავთ ყველა არჩევნებზე ე.წ ძველი ბიჭების, მოკრიმინალო ელემენტების და სუს-ის წარმომადგენლების მობილიზაციას საარჩევნო უბნებზე. ეს ხდება იმისთვის, რომ მათ დააშინონ ხალხი და ჩვენ ამ არჩევნებზე მათ ამის საშუალებას არ მივცემთ. ზუგდიდში გარდაუვალია გაერთიანებული ოპოზიციის კანდიდატის გამარჯვება და ხელისუფლებას აქვს იმის მცდელობა, რომ გააყალბოს შედეგი, ამის საშუალებას არ მივცემთ ჩვენ. ოცნება დაკავებულია პროვოკაციული განცხადებებით და ყალბი კვლევებით, რომლის შესახებაც თვითონ ოცნების კანდიდატისთვისაც არ არის ცნობილი. ჩვენ მობილიზაციას ვახდენთ ზუგდიდში მხოლოდ იმისთვის, რომ მათ არ მივცეთ არჩევნების გაყალბების საშუალება. არ მოვაპარინებთ ბიძინა ივანიშვილს არჩევნებს, ძველი ბიჭების, კრიმინალების და მოძალადეების ხელით.“- განაცხადა თინა ბოკუჩავამ.