"ჩალითაა ეს ქვეყანა დაფარული როგორც ჩანს და სრული უკანონობაა" - ჟურნალისტი ლევან თორია მის წინააღმდეგ დაწყებულ გამოძიებაზე

პოლიტიკა - 12:07, 18 May, 2019

1074

ტელეკომპანია "ოდიშის" ჟურნალისტს ლევან თორიას, რომელიც სანდრა რულოვსზე თავდასხმისას, თავს იცავდა, შსს-მ ბრალი წაუყენა.შსს-ს განცხადებაში ნათქვამია, რომ თორიას ბრალი ძალადობის ფაქტზე, სისხლის სამართლის კოდექსის 126-ე მუხლის პირველი ნაწილით წარედგინა. მათივე ცნობით, გამოძიებით დადგინდა, რომ ბრალდებულმა ლევან თორიამ მიმდინარე წლის 14 მაისს, ზუგდიდში დადიანების სასახლის ეზოში ფიზიკური შეურაცხყოფა მიაყენა მოქალაქეს. ლევან თორიას ინფორმაციით მის საქმეზე უკვე ჩანიშნულია სასამართლოც, ჟურნალისტი მის წინააღმდეგ საქმის წარმოებას უსამართლობას უწოდებს და აცხადებს, რომ ის საკუთარ თავს და გადაცემის სტუმრებს იცავდა თავდამსხმელების ორგანიზებული ჯგუფისგან:

“ახლა გავიგე რომ ჩაინიშნა სასამართლო, 2 დღეში უკვე საქმე გამოიძიეს, მაშინ როდესაც 4 წლის წინ ჩემზე თავდასხმა დღესაც გამოუძიებელია, რაც შეეხება ძალადობის მუხლით ჩემს წინააღმდეგ საქმის აღძვრას, ეს არის უსამართლობა და უკანონობა, მაშინ როდესაც ჩემს წინააღმდეგ და ჩემი სტუმრების წინააღმდეგ განხორციელდა თავდასხმა და გადაცემის ჩაშლა მოხდა ფაქტობრივად. ასეთ პირობებში ჩემს წინააღდმეგ საქმის წარმოება არის უკიდურესი უსამართლობა, ის თავდამსხმელებიც და მეც იგივე მუხლით უნდა გაგვასამართლონ? ჩალითაა ეს ქვეყანა დაფარული როგორც ჩანს და სრული უკანონობაა.“- განაცხადა ლევან თორიამ, მისი თქმით, მას და გადაცემის ჩაწერაში მონაწილე სხვა პირებს ორგანიზებული ჯგუფი დაესხა თავსნ და მას მოუწია საკუთარი თავის და სტუმრების დაცვა.

„თუ თავის დაცვა არის ძალადობა და აგრესია, მაშინ რაზეა საუბარი?“- განაცხადა თორიამ.

თორიას ადვოკატის მირანდა გოგოხიას განცხადებით, მისი დაცვის ქვეშ მყოფი აუცილებელი მოგერიების ფარგლებში მოქმედებდა და თავს იცავდა თავდამსხმელების აგრესიისგან. გოგოხიას თქმით, მას იმედი აქვს რომ სასამართლო ობიექტურ გადაწყვეტილებას გამოიტანს.

14 მაისს, დადიანების ეზოში პარტია "ქართული ოცნების" კოორდინატორები გაერთიანებული ოპოზიციის მერობის კანდიდატს გადაცემის ჩაწერის დროს დადიანების ეზოში დაუპირისპირდნენ. მათ ფიზიკური და სიტყვიერი შეურაცხყოფა მიაყენეს სანდრა რულოვსის თანმხლებ პირებს და გადაცემის წამყვან ლევან თორიას.