" ეკონომიკური კუთხით, რომ უმძიმესი სოციალური ფონია და ძალიან ბევრი გაჭირვებული ადამიანი გვყავს" - ბესელია "ოცნების" და ივანიშვილის რეიტინგის ვარდნაზე

პოლიტიკა - 19:49, 17 May, 2019

1256

"ქართული ოცნების" და ბიძინა ივანიშვილის რეიტინგის ვარდნა - აღნიშნულ ფაქტს, პარლამენტის წევრი, ეკა ბესელია, ქვეყანაში არსებულ მძიმე სოციალურ ფონს უკავშირებს.

დეპუტატის შეფასებით, მოსახლეობა უკმაყოფილოა მმართველი გუნდის მიერ გატარებული პოლიტიკით.

„ეს საპირისპირო მოქმედებები, რომელიც გამოიხატა პირველ რიგში, სამართლიანობის კუთხით, სრულიად გაუგებარი გადაწყვეტილებების, არასწორი გადაწყვეტილებების მიღებაში და ეკონომიკური კუთხით, რომ უმძიმესი სოციალური ფონია და ძალიან ბევრი გაჭირვებული ადამიანი გვყავს, ეს იწვევს ამ კრიტიკულ განწყობებს. მე შორს ვარ იმ აზრისგან, რომ ვისაც ელემენტარულად ესმის, რა არის პოლიტიკური პროცესი, ამ უკმაყოფილების და არასწორი მართვის მოდელის ფონზე, მესამე არჩევნები მოიგოს მმართველმა პარტიამ, საპარლამენტო არჩევნებს ვგულისხმობ, მგონია, რომ ცვლილებების დროა.

„თავად თქვა ბიძინა ივანიშვილმა, რომ ის არის ამ სამართლიანობის განსჯის პროცესში იმ მხარეს, სადაც საზოგადოებამ თქვა, რომ ეს არის წარსული, ეს ცუდია და უარი თქვა და ამის გამართლების პოზიციაზე დადგა, მე მგონი, ეს ერთ-ერთი ყველაზე მძიმე მომენტია და ფაქტორია, ნეგატიური განწყობების. სამწუხაროდ, მან ეს გზა აირჩია,“ - განაცხადა ეკა ბესელიამ.