განმუხურის მოსახლეობას გაერთიანებული ოპოზიციის - „ძალა ერთობაშია“ ზუგდიდის მერობის კანდიდატი და სხვა ლიდერები შეხვდნენ. მრავალრიცხოვან საზოგადოებას სიტყვით ოპოზიციის ერთ-ერთმა ლიდერმა და „ძალა ერთობაშიას“ პრეზიდენტობის კანდიდატმა გრიგოლ ვაშაძემ მიმართა.

მან თავდაპირველად ზუგდიდის მოსახლეობას გვერდში დგომისთვის მადლობა გადაუხადა.

„უღრმესი მადლობა ზუგდიდს, უღმესი მადლობა სამეგრელოს იმ გმირობისთვის და მხარდაჭერისთვის, რაც თქვენ გამოიჩინეთ, არ ვიქნებოდით დღეს იმ მდგომარეობაში, თქვენ რომ არ გქონდეთ ამდენი სიმამაცე და გამბედაობა. სამუდამო ვალში ვართ შენთან, ზუგდიდო, დიდი მადლობა“, - აღნიშნა ვაშაძემ.

მისი განცხადებით, გაერთიანებული ოპოზიციის მერობის კანდიდატი სანდრა რულოვსი 19 მაისის არჩევნებში აუცილებალდ გაიმარჯვებს ისევე, როგორც სხვა კანდიდატები დანარჩენ ქალაქებში:

„2013 წლის იანვარში ვინმეს რომ ეთქვა, რომ „ერთიანი ნაციონალური მოძრაობა“ ასეთი ძლიერი იქნებოდა, ვინმეს რომ ეთქვა, რომ ყველა პატიოსანი ადამიანი შემოგვიერთდებოდა და შეიქმნებოდა გაერთიანებული ოპოზიცია, ბევრი არ დაიჯერებდა, მაგრამ სჯეროდა იმ ბრძოლისუნარიან უმცირესობას, რომელიც აუცილებელია იმისთვის, რომ მოიპოვო გამარჯვება. თქვენ ხართ ეგ ბძოლისუნარიანი უმცირესობა, რომელიც უმრავლესობად გადაიქეცით და ჩვენ აუცილებლად მოვიგებთ, აუცილებლად შევცვლით ამ ხელისუფლებას, აუცილებლად გავიმარჯვებთ, არა შურისძიებისთვის, არა ანგარიშსწორებისთვის, არა საზოგადოების გაყოფისთვის, გავიმარჯვებთ იმიტომ, რომ საქართველო დაეფუძნოს იმას, რაც ქართველისთვის არის ყველაზე მთავარი - კანონი, სამართალი, პატივისცემა, თანასწორობა, ერთიანობა, პროგრესი, ამის გარეშე ჩვენს სახელმწიფოს ვერ გადავარჩენთ და ეს გამარჯვება უნდა დაიწყოს ზუგდიდიდან. ერთად გავიმარჯვებთ ყველგან - ხულოშიც, მარნეულშიც, ზესტაფონშიც! ჩვენი კანდიდატი არის ქალბატონი სანდრა ელიზაბეტ რულოვსი, ამ ადამიანს შეეძლო, მოდების ჩვენებაზე ჟიურიში მჯდარიყო, ამის მაგივრად სკრინინგის პროგრამა დაიწყო საქართველოში და უამრავი სიცოცხლე გადაარჩინა. ამ ადამიანს შეეძლო, ევლო სიმღერების კონკურსებზე, ამის მაგივრად საავადმყოფოში, მედდად მუშაობდა იმიტომ, რომ ეს მისი სამშობლოა და ამ სამშობლოზე მეტად არაფერი უყვარს, განსხვავებით იმ ხალხისგან, ვინც თავის თავს „ქართულ ოცნებას“ ეძახის და სამეგრელოს და საქართველოს ბიზნესპროექტად თვლის, ჩემოდნებს ტენიან ფულით, რომ აითესონ აქედან, რაც შეიძლება სწრაფად. გავიმარჯვებთ აუცილებლად, გაუმარჯოს ჩვენს კანდიდატებს“, - განაცხადა გრიგოლ ვაშაძემ.