"მიღებული აქვთ დირექტივა, რომ გაიტაცონ არჩევნების დროს ის ხალხი, ვინც მათ არ ემორჩილება"

"მიღებული აქვთ დირექტივა, რომ გაიტაცონ არჩევნების დროს ის ხალხი, ვინც მათ არ ემორჩილება" - ნიკა მელია ზუგდიდში საარჩევნო ტერორზე

პოლიტიკა - 13:03, 15 May, 2019

905

ზუგდიდის საკრებულოს წევრის, გია დანელიას ფარულ ჩანაწერთან დაკავშირებით, კომენტარი „ნაციონალური მოძრაობის“ პოლიტსაბჭოს თავმჯდომარემ ნიკა მელიამ გააკეთა. ნიკა მელიას თქმით, გავრცელებული ჩანაწერიდან ნათელი გახდა, რომ მმართველ გუნდში არსებობს დირექტივა, თუ შანტაჟი და საარჩევნოდ ამომრჩევლების დაშინება შედეგს ვერ გაოიღებს, არჩევნების დროს ის ხალხი გაიტაცონ, ვინც მათ არ ემორჩილება. ნიკა მელია აუცილებლად მიიჩნევს, რომ ზუგდიდის საკრებულოს წევრ გია დანელიას გამოძიების დასრულებამდე უფლებამოსილება შეუჩერდეს.

„ქართული ოცნების დეპუტატი, მხილებულია დანაშაულის ჩადენის მცდელობაში, რასაც ქვია ხალხის გატაცება. ქართული ოცნების ოფისში დაიგეგმა საარჩევნო ტერორი, დაშინება, შანტაჟი და ეს თუ არ იქნება წარმატებული, მაშინ მათ მიღებული აქვთ დირექტივა, რომ გაიტაცონ არჩევნების დროს ის ხალხი, ვინც მათ არ ემორჩილება. ამ ყველაფერს ახმოვანებს ბატონი დანელია, იგი უნდა გადადგეს, როგორც მინიმუმ შეუწყვიტონ უფლებამოსილება გამოძიების დასრულებამდე. ასევე აუცილებელია ყველა იმ მოძალადის დაკავება, ვინც გუშინ იძალადა, მათ შორის ასაკოვან ხალხზე.“- განაცხადა ნიკა მელიამ.

„ერთიანი ნაციონალური მოძრაობის“ ერთ-ერთმა ლიდერმა, „ქართული ოცნების“ ზუგდიდის მერობის კანდიდატ გეგა შენგელიას მიმართა და მოუწოდა, რომ ან ზუგდიდში წინასაარჩევნოდ განხორციელებული ძალადობის და შანტაჟის ფაქტები დაგმოს, ან აღიაროს, რომ სწორედ ასეთი ძალადობრივია მისი საარჩევნო კამპანია. მელიას თქმით, შენგელიას დუმილი სწორედ ამას ამტკიცებს:

გეგა შენგელიას მივმართავ, ძალიან ვწუხვარ რომ ის გახდა დანაშაულებრივი მექანიზმის ჭანჭიკი. მე მოვუწოდებდი მას, ან გამო ვიდეს და დაგმოს გუშინდელი ძალადობა და დანელიას მიერ ადამიანების გატაცების მცდელობა, რაც გუშინ ჩვენ მოვისმინეთ, ან გამოვიდეს და თქვას, რომ მე ასეთი ვარ და ეს არის ჩემი კამპანია. დუმილი ნიშნავს, რომ ბატონი შენგელია არის ის რაც ჩვენ გუშინ ვიხილეთ.“- განაცხადა ნიკა მელიამ.