ზუგდიდის ოლქში საუბნო საარჩევნო კომისიების რეგიტრატორების ბეჭდები მთლიანად შეიცვლება

ზუგდიდის ოლქში საუბნო საარჩევნო კომისიების რეგიტრატორების ბეჭდები მთლიანად შეიცვლება - ბრიფინგი ცესკოში

პოლიტიკა - 12:19, 15 May, 2019

799

ცენტრალურ საარჩევნო კომისიაში განაცხადეს, რომ ზუგდიდში საოლქო საარჩევნო კომისიის მხრიდან კანონის მოთხოვნების დარღვევას ადგილი არ ჰქონია, თუმცა ეჭვისა და ინტერპრეტაციების გამოსარიცხად, ცენტრალური საარჩევნო კომისია ზუგდიდის ოლქში საუბნო საარჩევნო კომისიების რეგისტრატორების ბეჭდებს მთლიანად შეცვლის:

„გუშინ, ზუგდიდის ოლქში გაურკვევლობა გამოიწვია საუბნო საარჩევნო კომისიებისთვის საარჩევნო ინვენტარისა და დოკუმენტაციის – კერძოდ, სამაგიდო სიების, საუბნო საარჩევნო კომისიისა და რეგისტრატორების ბეჭდების გადაცემის პროცესმა. გაკეთდა განცხადებები, რომ საოლქო საარჩევნო კომისიის მხრიდან ადგილი ჰქონდა კანონის მოთხოვნების დარღვევას, რაც არანაირად არ შეესაბამება სიმართლეს. ცალსახად გვინდა განვაცხადოთ, რომ არანაირ კანონდარღვევას ადგილი არ ჰქონია. კანონის შესაბამისად, სიების საბოლოო ვერსიის (მათ შორის სამაგიდო ვერსიის) გადაცემა უნდა მოხდეს კენჭისყრის დღემდე არაუგვიანეს მეორე დღისა ( ანუ, ამ შემთხვევაში ამ დოკუმენტაციის გადაცემა 17 მაისამდე უნდა მოხდეს). ამასთან, საუბნო საარჩევნო კომისიებისთვის გადაცემული საუბნო საარჩევნო კომისიების ბეჭდებიც და რეგისტრატორების ბეჭდებიც დალუქულია კანონის შესაბამისად და მათი გახსნა მოხდება მხოლოდ კანონით განსაზღვრულ დროს და მათი რამე სახით წინასწარ გამოყენება შეუძლებელია. მნიშვნელოვანია, რომ ინვენტარისა და დოკუმენტაციის გადაცემა ასეთ სახეს ატარებს ყოველი არჩევნების დროს და აბსოლუტურად კანონიერი პრაქტიკაა არა მხოლოდ ზუგდიდში, არამედ სხვა საარჩევნო ოლქებშიც. ამის მიუხედავად, რამდენადაც ეს საკითხი გახდა სპეკულაციის საგანი და ადგილი ჰქონდა საზოგადოების შეცდომაში შეყვანის მცდელობას, თითქოს საარჩევნო ოლქის მიერ უბნების სათანადო ინვენტარითა და დოკუმენტაციით აღჭურვა იყო კანონდარღვევა და საფრთხეს უქმნიდა არჩევნებს, ზუგდიდის საოლქო საარჩევნო კომისიის თავმჯდომარემ მიიღო გადაწყვეტილება სამაგიდო სიების და ბეჭდების უკან – საოლქო კომისიაში დაბრუნებისა და მათი მოგვიანებით – ბიულეტენებთან ერთად გადაცემის შესახებ. ამასთან დამატებით ყოველგვარი ეჭვებისა და ინტერპრეტაციების გამოსარიცხად, ცენტრალური საარჩევნო კომისია ზუგდიდის ოლქში საუბნო საარჩევნო კომისიების რეგიტრატორების ბეჭდებს მთლიანად შეცვლის.“- განაცხადა დღეს გამართულ ბრიფინგზე ცესკო-ს პრესსპიკერმა, ანა მიქელაძემ.

შეგახსენებთ, ზუგდიდის #67 საოლქო კომისიასთან საპროტესტო აქცია იმართება. აქციაზე შეკრებილი საზოგადოება და ოპოზიციის წარმომადგენლები საოლქო კომისიის თავმჯდომარე მირანდა მესხს არჩევნების გაყალბების მცდელობაში ადანაშაულებენ და მის გადადგომას ითხოვენ. ოპოზიციის განცხადებით საოლქო კომისიიდან სარეგისტრაციო ბეჭდების და საარჩევნო სიების უკანონოდ გატანა მოხდა, რაც ამომრჩეველზე ზეწოლის მიზნით იქნებოდა გამოყენებული, აღნიშნულ ფაქტზე სისხლის სამართლის საქმის აღძვრას ითხოვენ.