"არანაირი კანონდარღვევა არ ჩამიდენია" - ზუგდიდის საოლქო საარჩევნო კომისიის თავმჯდომარე ბრალდებას უარყოფს

პოლიტიკა - 12:19, 15 May, 2019

833

ზუგდიდის 67-ე საოლქო საარჩევნო კომისიის თავმჯდომარის, მირანდა მესხის განცხადებით, მას კანონი არ დაურღვევია და საარჩევნო ინვენტარი და სიები მან კანონის სრული დაცვით გასცა.

„მე არანაირი კანონდარღვევა არ ჩამიდენია. მიღება-ჩაბარების აქტით ეტაპობრივად გაიცემა გარკვეული ტიპის დოკუმენტიაც და ინვენტარი, ვინაიდან, მოგეხსენებათ 67-ე ზუგდიდის საოლქო საარჩევნო კომისია არის მრავალრიცხოვანი უბნებისგან შემდგარი. ამიტომ ერთი დღის განმავლობაში შეუძლებელია დოკუმენტის და ინვენტარის ერთდროულად გაცემა. ამიტომ ეტაპობრივად მიღება-ჩაბარების აქტით ვაძლევთ ხელმძღვანელ პირებს. კანონმდებლობიდან გამომდინარე, დალუქვის წესი, ეს არის მოთავსდეს კონვერტში, გადაწეპვის ზოლზე დაისვას საოლქო საარჩევნო კომისიის ბეჭედი და ხელი მოწერილი იქნას ხელმძღვანელი პირის მიერ. ასევე ის ბეჭდის რეკვიზიტები ყველა დატანებული იყო იმ კონვერტზე, სადაც იყო მოთავსებული ის ბეჭედი. შეგვიძლია დაგანახოთ სარეგისტრაციო ჟურნალი სადაც გატარებულია თითოეული უბნის ბეჭდის კოდი შესაბამისად რეგისტრატურის ბეჭდის კოდები, ვინ რომელი უბანი, რომელი ბეჭდის ნომრებით იმუშავებს. ეს ყველაფერი იყო კანონის შესაბამისად დაცული კანონმდებლობის შესაბამისად. არც სიების გატანასთან დაკავშირებით დამირღვევია კანონი, ვინაიდან არაუგვიანეს ორი დღისა გასცემს საოლქო საარჩევნო კომისია ამ სამაგიდე სიებს“- განაცხადა მირანდა მესხმა.

შეგახსენებთ, ოპოზიციამ საოლქო კომისიიდან სიების გატანის ფაქტი გუშინ დააფიქსირა, სიები საოლქო კომისიაში მას შემდეგ დააბრუნეს, რაც ოპოზიციამ, ხელისუფლების მიერ, არჩევნების ორგანიზებულად გაყალბების გეგმაზე საუბარი დაიწყო და ეს ფაქტი, საარჩევო კომისიაში გააპროტესტა.

ზუგდიდის საოლქო საარჩევნო კომისიის შენობასთან, ოპოზიცია აქციას მართავს, საპროტესტო აქციის მონაწილეების საოლქო კომისიის თავმჯდომარის გადადგომას და ფაქტზე სისხლის სამართლის საქმის აღძვრას ითხოვენ.