„მე მომიწევს შენი დაცვა, ვინმემ რომ ტყვია შუბლში არ დაგაჭედოს... ჩემზე არ ინერვიულო - მე ისედაც მკვდარი ვარ"- მაჩალიკაშვილი გოგაშვილს

პოლიტიკა - 11:22, 15 May, 2019

2116

სუს-ის ხელმძღვანელის ყოფილი პირველი მოადგილის, სოსო გოგაშვილის განცხადებით, რისკის ქვეშ არის მისი და მალხაზ მაჩალიკაშვილის სიცოცხლე, რის გამოც გოგაშვილი სამართალადამცველებს ყურადღების გამოჩენისკენ მოუწოდებს.

„რისკის ქვეშ არის ჩემი და ვახას სიცოცხლეც . მე, არანაირად არ ვარ შურისმაძიებელი და არც ვაპირებ კანონს იქით გადავიდე, მაგრამ მას რომ რამე დაუშავდეს, პირველ რიგში, ვინ იქნება ეჭვმიტანილი?! გოგაშვილი და სახელმწიფო. ან, პირიქით, მე რომ რამე დამიშავდეს და ვახამ არ გააკეთოს ეს, ვახა იქნება ეჭვმიტანილი და ეს გამოიწვევს ძალიან მძიმე მდგომარეობას და დაძაბულობას საქართველოში. ამიტომ, მოვუწოდებ ძალოვნებს, რომ ამას ძალიან დიდი ყურადღება მიაქციონ და მაქსიმალური ყუდღებით იყვნენ ჩემი და იმ ადამიანის მიმართ. “ – განაცხადა გოგაშვილმა ტელეკომპანია „იმედთან“ 2017 წლის დეკემბერში პანკისში ჩატარებულ სპეცოპერაციაზე საუბრისას, რომელსაც მალხაზ მაჩალიკაშვილის შვილის, თემირლან მაჩალიკაშვილის, სიცოცხლე შეეწირა.

აღნიშნულ განცხადებას სოციალურ ქსელში უპასუხა მალხაზ მაჩალიკაშვილმა:

"მე მომიწევს ახლა შენი დაცვა, ვინმემ რომ ტყვია შუბლში არ დაგაჭედოს. არც მე გადავაბიჯებ კანონს და სამართალს იმიტომ, რომ ცოცხალი და უვნებელი მჭირდები, რომ გახსნა ის ბინძური ჯაჭვი, რაც თქვენს კისერზე დევს. ძნელად წარმოსადგენი ცოდო შენ უნდა იცოცხლო, გახსნა ის კარტები, რომელი კარტებიც ამ ხელისუფლებას ყველაფერს თავზე დაამხობს და ჩემს სიცოცხლეზე არ ინერვიულო - მე ისედაც მკვდარი ვარ".- დაწერა მალხაზ მაჩალიკაშვილმა.