ზუგდიდში წინასაარჩევნოდ ამომრჩევლის მოსყიდვის მორიგი ფაქტი დაფიქსირდა - ერთ-ერთი ადგილობრივის განცხადებით, „ქართული ოცნების“ მერობის კანდიდატის, გეგა შენგელიას წარმომადგენლები მას მხარდაჭერის სანაცვლოდ 150 ლარს სთავაზობდნენ.

ქალბატონის განცხადებით, რამდენიმე პირი მას „ქართული ოცნების“ წარმომადგენლად გაეცნო და თანხის სანაცვლოდ, შენგელიასთვის ხმის მიცემა შესთავაზა. მიღებული უარი შემდეგ, მას ფულადი ანაზღაურების გარდა, სხვა პრივილეგიებსაც დაჰპირდნენ:

“წარმოდგენა არ მქონდა ეს ხალხი ვინ იყო. თვითონ დაიწყეს საუბარი, რომ ჩვენ ოცნებიდან ვართო. თუ თქვენ ჩვენ ხმას მოგვცემთო, ხმის სანაცვლოდ ჩვენ 150 ლარს დაგირიცხავთო. ანუ გეგა შენგელიასთვის უნდა მიმეცა ხმა. თქვენი 150 ლარი, თქვენი ხმის სანაცვლოდ მე არაფრად არ მიღირს მეთქი, ასე რომ კარგად ბრძანდებოდეთმეთქი. ესენი არაფრის დიდებით არ მომეშვნენ, 150 ლარს კი არა, კიდევ ბევრ რამეში დაგეხმარებით და ბევრ რამეში შეგიწყობთო ხელსო,“-განაცხადა ერთ-ერთმა მოქალაქემ.

მომხდართან დაკავშირებით შესაბამისი უწყებების მხრიდან სათანადო რეაგირებას ითხოვს გაერთიანებული ოპოზიცია - „ძალა ერთობაშია“:

„მიაკითხეს ყველაზე გაჭირვებულ ხალხს, დევნილებს, მაგრამ მე მინდა ვუთხრა „ქართულ ოცნებას“, რომ დევნილები არიან ყველაზე მაგარი ადამიანები და დევნილები სამშობლოს არ გაჰყიდიან 150 ლარის გულისთვის. აბსოლუტურად ყველას გამოვავლენთ, ყველა დამრღვევ პირს და ყველა დაისჯება კანონის წინაშე უკიდურესად,“-აცხადებს ენმ-ს წევრი ბესო შენგელია.