შავი ზღვის რეგიონის უსაფრთხოება, რუსეთიდან მომდინარე საფრთხეები და მედიის როლი აღმოსავლეთ ევროპის უსაფრთხოების უზრუნველყოფაში - ამ თემებზე თბილისში შავი ზღვის უსაფრთხოების მასშტაბური კონფერენცია იმართება.

ანალიტიკოსები, ვინც დღევანდელ შეხვედრას ესწრებოდა, თავდაცვის და უსაფრთხოების მნიშვნელობაზე ამახვილებდნენ ყურადღებას. დარგის ექსპერტები ასევე აღნიშნავენ, რომ მთავრობამ მსგავსი ტიპის ღონისძიებები უნდა გამოიყენოს და ესაუბროს პარტნიორებს.

ღონისძიების მონაწილეები უკმაყოფილებას გამოხატავდნენ, რომ დღევანდელ შეხვედრას თავდაცვის მინისტრი არ ესწრებოდა. თუმცა, პროგრამაში აღნიშნული იყო, რომ ღონისძიებაში მონაწილეობა შესაძლოა, მიეღო თავდაცვის მინისტრს, ლევან იზორიას.

ღონისძიებაზე 50-ზე მეტ მაღალი რანგის მომხსენებელს ელოდებიან. ღონისძიებაზე იმყოფება თავდაცვის ყოფილი მინისტრი, თინა ხიდაშელი, რომელიც ამბობს, რომ სწორედ ასეთ შეხვედრებზე უნდა დადიოდეს იზორიას უწყების წარმომადგენლები.

„უბრალოდ, პროტოკოლით არ შეიძლება, თავი დავანებოთ სტრატეგიულ ინტერესებს, რომ პარტნიორი ქვეყნის თავდაცვის მინისტრის მოადგილეები ესწრებოდნენ კონფერენციას და იყვნენ მომხსენებლები და არ იყვნენ ანალოგიურად მასპინძელი ქვეყნის წარმომადგენლები... თამამად შემიძლია, გითხრათ, რომ პირველი შემთხვევაა, როდესაც ასეთ უპასუხისმგებლობას ვხედავ ხელისუფლების მხრიდან. ეს, რა თქმა უნდა, მორიგ ჯერზე უდასტურებს ჩვენს მეგობარ ქვეყნებსაც და მეგობარ ექსპერტებს, რომ განსაკუთრებული ინტერესი, აქტიურობა საგარეო ფრონტზე თავდაცვისა და უსაფრთხოების სფეროში, მაინცდამაინც, არ შეინიშნება და ამის მოლოდინი არ უნდა გვქონდეს,“ - განაცხადა თინა ხიდაშელმა.

შეხვედრის მთავარ თემებს თავდაცვა და უსაფრთხოება, ასევე ოკუპირებული რეგიონები და იქიდან მომდინარე საფრთხეები წარმოადგენს. „თავდაცვისა და უსაფრთხოების საკითხებში სამოქალაქო საბჭოს” გამგეობის წევრი, თეონა აქუბარდია მსგავსი ტიპის კონფერენციებში თავდაცვის სამინისტროს მხრიდან პასიურობას კრიტიკულად აფასებს და ამბობს, რომ ქვეყნის იმიჯზე ეს უარყოფითად აისახება.