"არა თავისუფლებას", "ძალაც და უფლებაც ოლიგარქს" - საპროტესტო ლოზუნგები თბილისში

პოლიტიკა - 13:49, 12 May, 2019

1130

"უფრო მორჩილი სასამართლო," "არა თავისუფლებას," "ძალაც და უფლებაც ოლიგარქს," - დედაქალაქის უბნებში, ხიდებზე ამ შინაარსის პოსტერები გამოჩნდა. სამოქალაქო აქტივისტებმა ლოზუნგებით ხელისუფლების პოლიტიკა გააპროტესტეს და თბილისის ქუჩებში ბანერები გამოფინეს. საპროტესტო შინაარსის ბანერები ხიდებზე დიდხანს არ გაუჩერებიათ. სამოქალაქო აქტივისტებისთვის უცნობია თუ ვინ ჩამოხსნა ისინი.

პროტესტი კლუბ „ბასიანსა“ და „გალერიში“ ერთი წლის წინ განვითარებულ მოვლენებს ეხებოდა.

„2018 წლის 12 მაისს საქართველოს ხელისუფლებამ იარაღი მიუშვირა თავისუფალ სივრცეებში საცეკვაოდ შეკრებილ ადამიანებს და ამის პასუხად ათიათასობით გულანთებული ადამიანის ერთობა მიიღეთ. თქვენ რა თქმა უნდა ბოდიში უნდა მოგეხადათ. თქვენი ბოდიში მიღებულია არა იმიტომ, რომ დავიჯერეთ მისი გულწრფელობის, ან გვგონია, რომ ეს ბოდიში რამეს შეცვლიდა, ან ამაზე უარესი არაფერი გიქნიათ, ან ვენდეთ დაპირებებს (ჩვენ უკვე დიდი ხანია აღარ გენდობით თქვენ), დიდი ხანია ბოდიში გაქვთ მოსახდელი საზოგადოებისთვის, იმ ყველაფრის გამო, რაც ამ წლებში დაგვმართეთ,“ - ნათქვამია სამოქალაქო აქტივისტების მიერ, სოციალურ ქსელში გავრცელებულ განცხადებაში.