საქართველოს ხელისუფლება დღეს, ერთგვარად, სირაქლემის პოზაში იმყოფება, - ამის სესახებ ედპ-ს ლიდერმა ბაჩუკი ქარდავამ „პრაიმტაიმის“ პრესკლუბში განაცხადა. მისი თქმით, იმის თქმა, რომ რუსული აგრესიის დროს უფრო მეტი ოჯახები აიყარა და უფრო მეტი ტერიტორია დაიკარგა, ვიდრე დღეს, როცა სულ სამი ოჯახია აყრილი, დაუშვებელია:

„მინდა ვუთხრა ზაქარეიშვილს, რომ ოკუპაციოა ოჯახების რაოდენობითა და კვადრატული მეტრებით არ იზომება, რადგან ზოგჯერ, შესაძლოა, რამდენიმე მეტრის ოკუპაცია უფრო მეტი საფრთხის შემცველი იყოს, ვიდრე უფრო დიდი ტერიტორიის დაკარგვა.

არ ვეთანხმები პრემიერმინისტრს იმ მოსაზრებაში, რომ ე.წ. საზღვრის გავლება რუსი სამხედროების თვითნებობაა. საზღვრის გავლებაც სამხედრო აგრესიაა, რადგან ამას სამხედროები აკეთებენ და ეს მათი თვითნებობა კი არა, რუსეთის ბუნებაა“, - აღნიშნა ბაჩუკი ქარდავამ და ხაზი გაუსვა, რომ „ევრაზიული კავშირისკენ“ სომხეთის მიერ გადადგმული ნაბიჯების მიუხედავად, სომხეთი რუსეთისთვის არ იქნება საკმარისი და ის შეეცდება, ორივე დამოუკიდებელი სახელმწიფო - საქართველო და აზერბაიჯანი ახალი გაერთიანებისკენ გადახაროს. ქარდავას თქმით, რუსეთის ინტერესებში იმ პოლიტიკური მნიშვნელობის მაგისტრალებთან და ობიექტებთან მიახლოებაც შედის, რომელიც გადის რეგიონში და კონკრეტულად, საქართველოს ტერიტორიაზე.