საპირფარეშო დოლისყანის ტაძარში - რა ხდება ქართულ სალოცავში და რას აცხადებს თურქეთში საქართველოს ელჩი

პოლიტიკა - 14:45, 11 May, 2019

1979

დოლისყანის ტაძარში საპირფარეშოს აშენებდნენ, თურქეთის ტერიტორიაზე მდებარე საქართველოს კულტურული მემკვიდრეობის ძეგლთან დაკავშირებით საგანგაშო ინფორმაცია პროფესორმა ბუბა კუდავამ ფეისბუკგვერდზე გაავრცელა. მისი თქმით, „კარიბჭეში უკვე ამოთხრილია ორმოები, რომლებიც რკინის ცხაურითაა დაფარული (ზედ ქვები აყრია). ჩალაგებულია მილები, ტაძარში შეტანილია შესაბამისი მასალა და დღე-დღეზე ალბათ ბეტონსაც დაასხამენ.“

ინფორმაციის გავრცელების შემდეგ საკთხის გარკვევაში ჩაერთო თურქეთში საქართველოს ელჩი.

როგორც რადიო თავისუფლებას თან თურქეთის რესპუბლიკაში საქართველოს სრულუფლებიანმა ელჩმა გიორგი ჯანჯღავამ სატელეფონო საუბარში განაცხადა, თურქეთის ტერიტორიაზე მდებარე საქართველოს კულტურული მემკვიდრეობის ძეგლის დოლისყანის კარიბჭესთან ტუალეტის მშენებლობა შეწყვეტილია.

მისი სიტყვებით, თურქული მხარე გაგებით მოეკიდა საქართველოს პოზიციას, რისთვისაც ელჩი მათ მადლობას უხდის.

„ჩვენ მივიღეთ შეტყობინება, რომ სოფელ ართვინში, დოლისყანის მონასტრის კარიბჭესთან მიმდინარეობდა საპირფარეშოს მშენებლობა. ჩავაყენეთ საქმის კურსში თურქეთის კულტურის სამინისტრო, ძეგლთა დაცვის და სხვა სამსახურები და მათ მიიღეს გადაწყვეტილება მშენებლობის შეჩერების შესახებ.“

გიორგი ჯანჯღავას ინფორმაციით, ტუალეტის მშენებლობის გადაწყვეტილება ადგილობრივების მიერ იყო მიღებული.