"ეს პერიოდი ჩემი ჯანმრთელობის რეაბილიტაციას მოვახმარე"- გვენეტაძე თანამდებობიდან წასვლისა და კონფლიქტების მიზეზებზე ალაპარაკდა

პოლიტიკა - 16:17, 10 May, 2019

878

უზენაესი სასამართლოს ყოფილი თავმჯდომარე ნინო გვენეტაძემ, ხანგრძლივი დუმილის შემდეგ, დღეს ჟურნალისტების კითხვებს უპასუხა. გვენეტაძე ზეწოლა უარყო და ამბობს, რომ თანამდებობა ჯანმრთელობის მდგომარეობის გაუარესების გამო დატოვა.

უზენაესი სასამართლოს ყოფილმა თავმჯდომარემ უპასუხოდ დატოვა კითხვა, - გახდა თუ არა თავის დროზე შანტაჟის მსხვერპლი და ვინ აიძულა პოსტი დაეტოვებინა, თუმცა არ უარყვია კონფლიქტები, რომელზეც მისი თანაშემწე საუბრობდა.

„უზენაესი სასამართლოს თავმჯდომარის, იუსტიციის საბჭოს თავმჯდომარის და აქტიური მოსამართლის პოზიციის განხორციელება ძალიან დიდ ძალისხმევას ითხოვდა, რამაც რეალური ასახვა ჰპოვა ჩემს ჯანმრთელობაზე. ამდენად, მე დამჭირდა დრო სარეაბილიტაციოდ. განცხადებაც, რომელიც წერილობით გავაკეთე აბსოლუტურად დეტალურად შეიცავდა ამ ინფორმაციას. მე არ ვიცი რატომ არ არის თქვენთვის ეს განცხადება სარწმუნო. ეს პერიოდი მოვახმარე ჩემი ჯანმრთელობის რეაბილიტაციას. დღეს მაქვს უნარიც და ჯანმრთელობის მდგომარეობაც მიწყობს ხელს, რომ აკადემიური და საგანმანათლებლო საქმიანობა განვახორციელო. არავითარი ზეწოლა ჩემზე არ განხორციელებულა. მე მყარი საკონსტიტუციო ვადით ვიყავი გამწესებული უზენაეს სასამართლოში და არავითარი ზეწოლა არ ყოფილა.

მე ვიცნობ ჩემი ყოფილი თანაშემწის განცხადებებს, მას აქვს მოსაზრებები, რომლებიც გარკვეულ საკითხთან მიმართებაში აზრთა სხვადასხვაობისას ბუნებრივია იწვევდა განსხვავებულ და ხშირად კონფლიქტურ სიტუაციებს და თუ მე მეკითხებით და ჩემი აზრიც გაინტერესებთ, ჩემმა თანაშემწემ საკმაოდ სწრაფად დატოვა შემდეგ ის პოზიცია, რომელსაც ჩვენ ერთად ვახორციელებდით და ამის შემდეგ საერთოდ სასამართლო ხელისუფლება, მართლმსაჯულების რეფორმის ეტაპები, კოლეგიურ ორგანოში მოღვაწეობა, როგორიც იუსტიციის საბჭოში, წარმოშობდა კონფლიქტებსაც, წინააღმდეგობრივ აზრებსაც, შეუთანხმლებლობასაც, ეს პროცესი იყო სამუშაო, რომლის მთავარი მიზანი იყო დამოუკიდებელი და გამჭვირვალე მართლმსაჯულების უზრუნველყოფა. ამდენად, მას თავისი შეხედულებები აქვს და თავისი ეთიკური სტანდარტი ამ საკითხთან მიმართებაში და საუბრობს ის, რაც იცის ან ნახა,“- განაცხადა ნინო გვენეტაძემ.