"საფრანგეთში ოფიციალურად გვეყოლება საემიგრაციო სამსახურის წარმომადგენლები"

"საფრანგეთში ოფიციალურად გვეყოლება საემიგრაციო სამსახურის წარმომადგენლები" - გიორგი გახარია

პოლიტიკა - 12:22, 10 May, 2019

797

საქართველოს შინაგან საქმეთა მინისტრი ადასტურებს, რომ საფრანგეთთან მიმართებაში თავშესაფრის მაძიებელთა რაოდენობა გაზრდილია. როგორც გიორგი გახარიამ ფრანგ კოლეგასთან კრისტოფ კასტანერთან შეხვედრის შემდეგ გამართულ ბრიფინგზე განაცხადა თავშესაფრის მაძიებლებთან დაკავშირებით ევროპელი კოლეგების კითხვებს საქართველოს ხელისუფლება სრული პასუხისმგებლობით აღვიქვამს და დარწმუნებულია, რომ ერთობლივი მუშაობით ეს ციფრები შემცირდება.

მინისტრის თქმით, თავშესაფრის მაძიებელტა რაოდენობის ზრდის ახსნა ბევრი სხვადასხვა მიზეზით შეიძლება, თუმცა მნიშვნელოვანია, რომ ამ მიმართულებით მუშაობა მიმდინარეობს და არსებობს კონკრეტული გეგმა.

„რა თქმა უნდა, მეც ვადასტურებ, რომ საფრანგეთთან მიმართებაში თავშესაფრის მაძიებელთა რაოდენობაში გვაქვს ზრდა. ეს ფაქტია, ეს არის ჩვეულებრივი სტატისტიკა. ამის ახსნა შეიძლება ბევრი სხვადასხვა მიზეზით. თუმცა ყველაზე მნიშვნელოვანიარის ის, რომ ჩვენ ამ მიმართულებით ვმუშაობთ, გვაქვს კონკრეტული გეგმა. აბსოლუტურად დარწმუნებული ვართ, რომ ეს გეგმა იქნება შედეგიანი ისევე, როგორც მსგავსი გეგმები ჩვენ განვახორციელეთ ევროპის სხვა ქვეყნებთან და იქ პოზიტიური შედეგი უკვე გვაქვს.

საფრთანგეთთან მიმართებაში, ისტორიულად ჩვენი სიახლოვე საქართველო-საფრანგეთს შორის, თუნდაც კულტურის მიმართულებით, არის დამატებითი მოტივი, რომ თუნდაც დამატებითი ნაკადი ევროპის სხვა ქვეყნებთან შედარებით, ცოტათი უფრო მაღალია. ამას ჩვენი მხრიდანაც სჭირდება შესაბამისი პასუხი, როგორც მეტი ორგანიზებულობა, მეტი კონცენტრაცია, რაც ჩვენ დღეს დავნერგეთ და საფრანგეთი იქნება პირველი ქვეყანა, სადაც ოფიციალურად გვეყოლება ჩვენი საემიგრაციო სამსახურის წარმომადგენლები. ამას ვაკეთებთ, რადგან ვხედავთ, საფრანგეთთან მიმართებაში გვჭირდება განსაკუთრებული ნაბიჯების გადადგმა, რასაც დღეის მდგომარეობით უკვე ვაკეთებთ.

თავშესაფრის მაძიებლების ზრდა, მას შემდეგ, რაც საქართველომ ბუნებრივად დაიმსახურა და აბსოლუტურად დამსახურებულად მიიღო თავისუფალი მიმოსვლა, იყო ბუნებრივად მოსალოდნელი პროცესი. ჩვენ სრული პასუხისმგებლობით აღვიქვამთ ჩვენი ევროპელი კოლეგების კითხვებს ამ მიმართებაში და ერთობლივად ვმუშობთ და დარწმუნებული ვართ, ერთობლივი მუშაობით, ამ მონაცემებს, ამ ციფრებს შევამცირებთ.“ - განაცხადა გიორგი გახარიამ.