"საქართველოს მოქალაქეების მიერ საფრანგეთში ჩადენილი დანაშაულის გამოძიებაში ქართველი სამართალდამცველებიც ჩაერთვებიან“- გიორგი გახარია

პოლიტიკა - 11:54, 10 May, 2019

742

საქართველოს საფრანგეთის შინაგან საქმეთა მინისტრი კრისტოფ კასტანერი სტუმრობს. ფრანგ კოლეგასთან შეხვედრის შემდეგ გამართულ ბრიფინგზე გიორგი გახარიამ საქართველოსა და საფრანგეთის თანამშრომლობაზე ისაუბრა და განაცხადა, რომ ხელი მოეწერა შეთანხმებას, რომელიც ხელს შეუწყობს ორგანიზებულ დანაშაულთან ბრძოლა კიდევ უფრო ეფექტური გახდეს. გახარიას თქმით, საუბარი ასევე შეეხო თავშესაფრის მაძიებელთა პრობლემის გადაწყვეტის მექანიზმებს.

„განვიხილეთ ის ორმხრივი თანამშრომლობის მნიშვნელოვანი საკითხები, რომელმაც ხელი უნდა შეუწყოს ჩვენს ქვეყნებს შორის წარმატებულ წინსვლას. რა თქმა უნდა, მადლობა გადავუხადეთ ჩვენს კოლეგებს იმ მხარდაჭერისთვის, რომელსაც საფრანგეთი უცხადებს საქართველოს ევროატლანტიკურ მისწრაფებებსა და ტერიტორიულ მთლიანობას. ვისაუბრეთ ორგანიზებულ დანაშაულთან ბრძოლაზე, ასევე თავშესაფრის მაძიებელთა პრობლემის გადაწყვეტის მექანიზმებზე. უვიზო მიმოსვლა არის საქართველოს ყველაზე დიდი მიღწევა და ერთ-ერთ ყველაზე მნიშვნელოვანი ინსტრუმენტი საქართველოს ევროკავშირთან დაახლოების და უსაფრთხოების თემები. მოვაწერეთ ხელი შეთანხმებას, რომელიც ხელს შეუწყობს ეს ბრძოლა კიდევ უფრო ეფექტური გახდეს. საქართველოს ორი ოფიცერი ჩართული იქნება ფრანგული პოლიციის გამოძიების პროცესში განსაკუთრებით, როცა საქართველოს მოქალაქეები ჩადიან დანაშაულს საფრანგეთის ტერიტორიაზე. განვიხილეთ ის ნაბიჯები, რომელიც საქართველოს უკვე გადადგა. ვისაუბრეთ უსაფრთხოების ნაწილში თანამშრომლობაზე ევროკავშირსა და საქართველოს შორის. საქართველოს მთავრობის მზადყოფნაა, გადადგას ყველა საჭირო ნაბიჯები, რათა ერთად შევძლოთ თავშესაფრის მაძიებელთა საკითხის გადაწყვეტა, ერთად დავამარცხოთ ორგანიზებული დანაშაული და ერთად ვიზრუნოთ ქვეყნების უსაფრთხოებაზე. საქართველოსა და თბილისში შსს ყოველთვის ღიაა თანამშრომლობისა და წინსვლისთვის.“- განაცხადა გიორგი გახარიამ.